Shillong, Rymphang 13 : Ka Khasi Hills Autonomous District Council ha ka sngi Baar ka la plie paidbah ïa ka jingtreikam online na ka bynta ban siew ïa ka Professional Tax ba la tip kum ka Online Payment System.
Ïa kane ka rukom treikam ba thymmai katkum ka juk ki kor ki bor mynta, la plie paidbah da ka Executive Member ka tnad Information Technology ryngkat u Executive Member ka tnad Taxation Bah Fantin J Lakadong ha ka jingdon lang u Executive Member ka Development Bah C Sohshang bad ruh u EM Arts & Culture Bah Victor Rani.
Nalor u Secreary ma Council, ki ophisar jong kitei ki tnad, la donlang ruh ha kane ka sngi naduh ki Ophisar ka National Informatics Centre bad kiwei kiwei.
Haba kren ha kane ka sngi, na ka liang ki Executive Member ki la pynpaw ba kane ka rukom treikam ba thymmai kan pynsuk shibun ïa ki paidbah kiba dei ban siew ïa ka Professional Tax namar kim donkam shuh ban wan mih dalade sha ophis.
Na ka liang ka Kong Grace bad Bah Fantin ki la ong ba kane ka sienjam kan ïarap ïa kito ba wan na ki jaka ba jngai ba kin siew online. Ki ong ba kane kan ïarap khamtam ïa kito kiba sah jngai bad pajih na Shillong ban wan siew ïa katei ka khajna da kaba shu siew online.
Ym tang katta la ong ruh ba kane kan ïarap ruh ïa ka jinglait ei ka khajna sharud bad kan pyntikna ïa ka jingkiew ka jingïoh lum khajna ha ka Council.
“Kino kino kynthup naduh ki businessman, ki nonghikai, ki nongkhaii, ki nongtrei kam sorkar bad kino kino ki lah ban siew noh online nangne shakhmat,” ki la ong haba kren bad ki lad pathai khubor.
Tad haduh mynta ki la don haduh 30, 000 ngut ki paidbah ba ju siew ïa ka professional tax sha ka council bad ka jingïoh lum khajna ha ka shisnem shisnem ka ju poi kumba 5 klur tyngka ei ei.
