Rung VPP sa u Secretary barim ka Congress ryngkat ki nongïalam UDP bad HSPDP

Shillong, Rymphang 13: U Bah Golden Nonglong, Secretary barim ka Meghalaya Pradesh Congress Committee (MPCC) ryngkat u Adviser jong ka Nongstoiñ Block Congress bad ki nongialam jong ka HSPDP bad UDP na Nongstoiñ, mynta ka sngi ki la wan pynïasoh noh sha ka Seng Voice of the People Party (VPP).
Ka kynhun kaba la wan bad u Bah Golden, uba la ïakhun ïa ka elekshon MLA 2023 na Rambrai na ka Seng Congress ka don palat sanphew ngut bad ka kynthup ruh ïa uwei u nongïalam ba la rim ka HSPDP jong ka Nongstoiñ, nangta ki nongïalam jong ka UDP, kynthup na ka Women’s Wing.
La pdiang sngewbha ïa ki ha ka jingïalang kaba la long ha ophis jong ka VPP ha Lad Nongkrem, ha kaba la pynïaid ïa ka jingïalang da u Dr. Kara Shen, Vice President ka Party bad la ïoh ïa ka jingkren na u Bah Adelbert Nongrum, MLA North Shillong, Bah Brighstarwell Marbañiang, MLA Mawlai, Bah Heaving Stone Kharpran, MLA Mawryngkneng bad u bah Ardent Miller Basaïawmoit, MLA Nonkrem.
Ki nongïalam jong ka Party ki la pynshai ïa ki nongrim jong ka Seng bad ïa ki mat treikam, khnang ba kine kiba wan rung thymmai sha ka Seng kin sngewthuh shai bad kin skhem bha ka nongrim haba ki wan pynïasoh sha ka Party.
Haba kren ha kane ka jingïalang, u Golden, u la ongh ba ka jingwan pynïasoh jongh u sha ka VPP kadei kaba u la pyrkhat sania bha mynta la phra bnai hadien ba u la mih noh na ka Seng Congress. “Ka daw kaba kongsan, ba ngi wan rung sha ka VPP kadei namar ba ka don ki nongrim kiba biang bad ka don ruh ki nongïalam kiba shlur bad kiba don ka nongrim kaba skhem”, u la ong.
Haba ai ka jingïaroh ïa ka jingtreikam jong ki saw ngut ki MLA ka VPP naduh ba ki la jop, u Bah Golden, u la ong ba ka kam nongmihkhmat kam dei tang ban ïasaid ha Assembly, hynrei lada donkam ban mihs ha surok bad u paidbah ruh dei ban mih beit. “U Mahatma Gandhi ruh u la mih sha surok ban ïoh jinglaitluid ka ri India. Te salei lada ki MLA ruh ki mih sha surok na ka bynta ka jingmyntoi jong u paidbah”, la ong u Bah Golden.
Kiwei kiwei pat kiba la ai jingkren napdeng kiba la wan rung sha ka Party mynta ka sngi, ki la ong ba dei namar ka jingiohi jong ki ba satang ha ka VPP ba I don jingkyrmen ïa ka ri bad jaidbynriew ba kiw pynïasoh bad kyrshan ïa ka VPP.
Nalor ba u la batai pynshai halor ki nongrim jong ka Seng, u Bah Ardent u la ther ruh ïa ki katto katne ki nongïalam kiba ong ba kam lei lei lada u Lat u kren da ka ktien Hindi ha Assembly. U la ong ba ka VPP kam isih ïa ka ktien Hindi, hynrei ka kren ïa ka nongrim jong ka ktien ka thylliej ba kum ka jylla dei ban ïeng, namar dei ka jingthmu pyntian jubor ka Assam ïa ka ktien Assamese ba sa mih ka jingïakhih Hill State. U la buh jingkylli ruh ba kita kiba ong ba kam lei lei lada kren Hindi ruh, hynrei hato ki kloi ban pdiang lada ka wan ka hokum na ka sorkar pdeng ban thok eksam noh da ka ktien Hindi? lane hato ki kloi ban pdiang lada ka sorkar pdeng ka hkukum ban kren noh da ka ktien Hindi ha ka jylla?.
U la ong ba ka liang ka VPP te da lei lei kan nym pdiang satia ia kane bad kan ïai pyrshah ïa kino kino ki jingthmu ban pyntian jubor ïa ka ktien Hindi ha ka jylla.