Shillong, Rymphang 13 : Ka sorkar jylla ka la ai jingthoh sha ka sorkar pdeng ba kan shah ban ker sainar najan u Zero Line ha khappud ka India bad Bangladesh.
Haba pyntip ïa kane mynta ka Sngi Ba Ar,u Symbud Myntri Rangbah uba peit ïa ka tnad kam pohïing ka sorkar jylla u bah Prestone Tynsong u la ïathuh “ Ka sorkar jylla ka la phah jingthoh sha ka tnad kam pohïing ka sorkar pdeng {Ministry of Home Affairs (MHA)} ba lada long kumno kumno ruh ngi pdiang ïa ka jingker sainar ha khappud hynrei ngi buh jingkyrpad ba ka jingker sainar ka dei ban long najan u Zero Line khappud ka India bad Bangladesh”.
U la ong ba ka nongrim ba ka sorkar jylla ka ïeng ka long kaba shai kdar namar ki mih bun ki jingeh na ka daw ba ki don ki bynta ne jaka ba ka jingker sainar ka ïaid ha kaba ki jaka rep jaka riang jong ki paid khappud ne ki jaka puta jong ki trai shnong la shah ker lut shabar ka jingker sainar.
Na kata ka daw kiba bun ki Dorbar Shnong ki pyrshah ïa kane ka jngker sainar bad ki ïai buh ka jingkyrpad sha ka sorkar India ban bishar bniah ïa kiba kum kitei ki jaka khnang ba ka jingker sainar kan long noh najan u Zero Line.
Kane ka jingpyrshah jur ka long eh khamtam ïa kito ki paid khappud kiba sah ha u pud u sam ka Amlarem Civil Sub Division kata ha West Jaintia Hills bad East Khasi Hills.
“ Kumta nga ong biang, ka nongrim jong ngi ka shai kdar ba ngi pdiang ïa ka jingker sainar bad wat ki shnong ki thaw ha khappud ruh ki pdiang ïa ka jingker sainar hynrei tang kawei ka long ba ki trai jaka puta, ki bor synshar shnong ba kin ym shah ne ailad da lei lei ruh ba ka jingker sainar kan long napdeng ki shnong ki thaw ne napdeng ki jaka rep jaka riang. Kumta na ka liang ka sorkar jylla ngi la shim khia ïa kane ka kam bad ngi la ïakren bad ai jingthoh sha ka sorkar pdeng ban bishar bniah ïa kane ka kam” ong u Symbud Myntri Rangbah.
U la ïathuh ruh, na kane ka daw ka jingker sainar mynta ka sangeh shwa namar ba mih bun ki jingpyrshah na ki paid khappud jong ki ar District.
“ Nalor kata wat ka sorkar ruh ka la dep bthah ïa ki bor synshar district ba kin ym shah ban bteng ïa ka jingker sainar katba ym pat shai ka jingïakren ïa pynbeit bad ka sorkar pdeng kata la ka dei ha War Jaintia ne ki jaka ba hap hapoh ka Amlarem Sub Division. Na kata ka daw tang shi inshi ruh ka jingker kam ïaid shuh ha kine ki jaka” ïathuh u bah Prestone.
