Nongpoh, Rymphang, 13: “La kha ïanga ban shakri bad ka mynsiem jong ka jingshakri ka dang ktik wat ha ka jinglong tymmen jong nga” ong u Dr. D. D Lapang haba kren ha ka jingïalang pynkup burom bad pynieng ïa ka Statue jong u mynta ka sngi ha Ri Bhoi College.
Kane ka jingioh lad jong u Dr. D.D Lapang ban pynpaw ïa katei ka mynsiem jong ka jingshakri sha ki paidbah wat ha ka jinglong tymmen jong u, ka dei ha ka jingïalang kaba la long mynta ka sngi ha Ri Bhoi College ba ka Young Minds Association of Ri Bhoi ka la pynïeng syndon da u motdur jong u Dr. D.D Lapang ban ai burom ïa u kum uta u nongïalam bakhraw ka Ri Bhoi bad ha ka jylla hi baroh kawei.
Da ka mynsiem jong ka jingsngewkmen ïa ka Young Minds Association of Ri Bhoi ba ka la kynmaw burom ban buh syndon ïa une u Statue jong utei u nongïalam, u Dr. D.D Lapang, u la ong ha ka jingshisha ha ka jinglong tymmen hadien ba nga la shongthaid na ka kam saiñ pyrthei, nga la rai ban shongthaid noh na ki kam shakri paidbah, hynrei kata ka mynsiem jong ka jingshakri ka dang kyrsoi ha ka dohnud bad ngam lah ban sangeh noh ïa ka kam shakri paidbah ha kaba ha ka jinglong tymmen bad ha kakum ka jingkotbor ngan dang bteng ïa kata ka jingshakri paidbah.
U la pynpaw ruh da kaba ong wat la u la kwah ban shongthaid na ka kam shakri paidbah bad ban ai por noh tang ha ka ïing ka sem, hynrei ka don ka jingsawa kaba mih na ka dohnud kaba ong ba la kha ïa me ban shakri. Dei halor kane ka Nongrim nga la rai ban bteng ka jingshakri kaba nga dang ring mynsiem bad ruh katba dang ïaid ka snam ha thied snam ha kaba ka kam shakri jong nga kan nym kut lano lano, u la ong.
Shuh shuh, ha kane ka snig, u la ai khublei kyrpang ym tang ïa ka Young Mind Association of Ri-Bhoi kaba la leh ïa kane ka kam ban pynsah jingkynmaw ïa ka jingïaid lynti jong ka jingim jong u bad u la ai khublei kyrpang ruh ïa baroh kiba la don kti ha kane ka sngi na ka bynta ban don lang kata ka mynsiem jong ka jingshakri ban kyntiew ïa ka bha ka mait bad ka roi ka par jong ka jaid bynriew hi baroh kawei, u la bynrap.
