Shillong, Rymphang, 13: Ki samla pule jong ka St. Anthony’s College hapoh ka jingïalam jong ka NEHU Students Union (NEHUSU), ki la pynpaw ïa ka pyrshah ïa ka hukum jong ki bor pynïaid College kiba la bthah ïa ki samla pule ban phong da ki Uniform haba ki wan sha klas.
Kine ki samla pule ki dei kiba pule ïa ka 4th Semester, k iban sa pule sa ïa ka 5th Semester, ka semester ba khatduh ban pyndep ïa ka jingpule ha ka Degree Level.
Kum ban shu kdew, ka St. Anthony’s College Shillong, ha ka 29 tarik Naiwieng, 2023 ka la pynmih ïa ka hukum ba la bthah ïa baroh ki samla pule ba kin phong noh da ki Uniform haba wan sha klas naduh mynta u snem 2024
Ki samla pule 4th Semester ki la pynlong da ka Signature Campaign ban pynpaw ïa ka jingpyrshah halor kane ka hukum ba la pynmih da ki bor pynïaid jong ka College bad pyntip ba haduh 400 ngut ki samla pule ki la ai jingkyrshan ïa kane ka jingdawa.
Ki samla pule ki la leit ban ïakynduh ïa u Principal jong ka College u Br. (Dr) Albert Dkhar ban pynsngew ïa ka jingeh jong ki samla pule na ka jingpynmih hukum da ka College.
Ha ka jingïakren bad ki lad pathai khubor, u samla Arman Malngiang ula ïathuh ba ki samla pule ki la dawa ïa u Principal ba dei ban pyllait noh ïa ki samla pule 4th Semester na ka hukum phong Uniform haba wan klas.
“Ngi don satang shi Semester ban pyndep ïa ka jingpule bad ki Uniform ki dei kiba shongdor T. 5000 tam. Ki hap ban pyrkhat lem ïa ngi kiba wan College sa tang shisnem,” la ong samla Malngiang haba pyntip ba ka jingshim klas ïa ki 4th Semester kan sdang ha ka taïew ban wan bad baroh ki samla pule ka Semester ki la rai ban ym phong satia ïa ki Uniform haba wan klas.
U ïathuh ba ïa kane ka rai, ki samla pule ruh la pyntip sha u Principal khnang ba un ym shim ïa kano kano ka lynti ban pynshitom ïa ki samla pule.
U la ïathuh ba u Principal um sym la ai satia ïa kano kano ka jingkular halor kine ki jingdawa bad pyntip ba un sa rah ban ïakren ïa kane ka jingpynsngew jong ki samla pule sha ki bor bahalor.
U la pyntip ruh ba ki samla pule ki la dawa ruh ïa u Principal ba naduh u snem ban wan, ka College ka dei ban thoh shai ha ki Prospectus bad ha ki Form ba ka long kaba donkam ba ki samla pule kin hap ban phong ïa ki Uniform hapoh ka College.
Haba kylli, u samla Malngiang u la pyntip ba ïa ka hukum ba pynmih ban bthah ïa ki samla pule ban phong Uniform la pynmih da ka Governing Body jong ka College.
