Shillong, Rymphang, 13: Ka jingpyrshang ban sdang pyntreikam noh ïa ka Pynursla Bypass kaba hap hapoh ka package-III jong ka surok Shillong-Dawki, ka la ïatyngkhuh jingeh bad ym lah satia ban pynthikna namar ka jingmih ki trai shnong ban pyrshah ïa kane ka kam
Ïa kane la pyntip hakhmat ka Ïingkashari Meghalaya High Court, haba shong bishar ïa ka PIL bala mudui da u Kaustav Paul.
Ka hukum ba la pynmih da u Chief Justice S Vaidyanathan bad Justice W Diengdoh ka ong ba ka la don ka Affidavit ba la phah ha ka Lah Sngi u Blei bad la batai shai lut ïa ki kam jong ki san tylli ki Package jong kane ka surok.
Haba ïadei bad ka Package-III, ka Affidavit ka ong ba ka jingshna pynbeit ïa ka surok ka dang don hapoh ka jingbishar bad ka jingpynkhreh ïa ka Detailed Project Report ruh ka dang ïaid shakhmat.
Hynrei, ïa ka surok jong ka Pynursla Bypass ym shym la lah ban rai namar ka jingmih ki jingpyrshah na ki trai shnong, kala ong.
Ka hukum ka pyntip ruh ba u Additional Advocate General u la pan por lai taïew ban wad ïa ki lad ki lynti ban pynkut noh ïa kane ka kam. Haba mynjur ïa ka jingkyrpad, ka Ïingkashari ka la buh ban shong bishar biang ïa ka mukotduma ha ka 28 tarik mynta u bnai.
