Shillong, Jymmang 18: Ka Liang Pyrshah All India Trinamool Congress kala kynnoh ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) ba kam shym la lah ban pyntreikam ïa ka Motor Vehicle Act ba khang ïa ki trok ban kit palat pud.
“Ka Sorkar kala rai khnang ban nym pyntreikam ïa kane ka Aiñ (Motor Vehicle Act)” ong u Nongïalam ka Liang Pyrshah Dr Mukul Sangma haba pyntip ba na ka liang ka jong u, ula dep thoh sha ka Chief Secretary haba ïadei bad ka jingpynbna (notification) bala pynmih da ka Sorkar Jylla hadien ka jingpynkylla thymmai ïa ka Motor Vehicla Act jong ka Sorkar Pdeng.
“Hato mynta kala pyntreikam ne em?Hato ngi la ïohi ïa kano kano ka dak ba ka pyntreikam?.Kam shym la don satia bad dei namar kata ba ki trok kiba kit palat pud kim shym la shah pynsajia” ula bynrap.
U Dr Mukul ula pyntip ruh ba ula kyndit ban tip ba la shah ïa ki trok ba kin kit mar ba khia ïa palat 40 metric ton. “Nga da kyndit ban ïohsngew ba uwei u rangbah ula ong ba u tip ba ki trok kiba ïaid lyngba ka Shillong, kiba ïaid lyngba ka Khasi Hills, kila kit mar ba khia palat 40 metric ton” ula ong.
U Dr Mukul ula kynnoh ba ka Sorkar kam shym la lah ban buh ryntih ïa ka rukom treikam ha kaban khanglad ïa ka jingkit palat pud jong ki trok kiba wan na kylleng ki bynta jong ka Jylla.
“Hato phi ïohi ïa kino kino ki rukom treikam ban tehlakam ïa ki trok kiba wan na Nongstoiñ, ki trok ba wan na Jaiñtia Hills bad kiwei kiwei ki jaka” ula ong haba bynrap “Kala paw shai kdar ba ka jingthmu jong ka Sorkar lah ban ong ba ka dei ka jingleh khnang, kaba la ïapeiñ ïa ka jingmyntoi jong ka Jylla bad ki paidbah bad ha ka jingduhnong jong ka Jylla. Mynta ka Jylla kala siew bainong ïa kine kiei kiei. Mano ban khanglad ïa kane”.
Haba iaroh ïa ka jingtuklar jong ka Ïingkashari, une u Myntri Rangbah barim ka Jylla ula ong “Ngan da buh jing kynmaw ïa ka jingsngew ban ai jingiaroh ba ka Meghalaya High Court kala tuklar bad shimkhia ïa kaei kaba jia”. Ula ong “Kane ka ai jingkyrmen ïa ki paidbah namar ka Sorkar kala rai ban shu long ka nongkyntait ïa kiei kiei baroh”.
“Ka Sorkar kala shu long ka nongkyntait ïa kat kaba don la kumba ka Sorkar hi ka dei kaba shah kynnoh. Nga kwah ban iasam jingtip bad ki paidbah lyngba jong phi ba kane ka sorkar ba mynta, lada ka ak kum ka nongshah kynnoh, ki paidbah ki don ïa ka nongrim ban ngeit ba ka dei kaba iadonbynta lang bad baroh kine ki jingleh bym hok” ong u Dr Mukul Sangma.
