Shillong, Jymmang 18: Ka Sorkar Jylla kala dep rai ban pynduh noh ïa ka Meghalaya Street Vendors (Protection of Livelihood and Regulation of Street Vending) Act, 2014 khnang ban pyntreikam noh da ka aiñ ka Sorkar Pdeng.
Ïa kane la pyntip da ka Sorkar Jylla sha ka Meghalaya High Court hynne ka sngi balang haba shong bishar ïa ka mukotduma bala mudui da ka Meghalaya & Greater Shillong Progressive Hawkers & Street Vendors Association (MGSPHSVA)
“Ka Sorkar Jylla ka tyrwa ban pynduh noh ïa ka Aiñ ka Jylla bad ban pyntreikam noh da ka aiñ ka Sorkar Pdeng haba ïadei bad ki nongshong dukan madan” ong ka Ïingkashari ha ka hukum.
Ka Sorkar kala pyntip ruh ba kane ka kam kala don mynta hapoh ka Cabinet ba kan shim rai haba ïadei bad ka Ordinance ban sa pynmih kat kum ka aiñ.
Ka Sorkar ka pyntip ruh ïa ka Ïingkashari ba hadien ka jingpynduhnoh ïa ka aiñ jong ka Jylla, kan sa wanrah noh mardor ïa ki Rules kat kum ka Aiñ jong ka Sorkar Pdeng.
Namar kane ka jingpyntip, ka Ïingkashari kala rai ban shong bishar biang ïa kane ka mukotduma ha ka 1 tarik u Naitung.
