Pyrshah ka DS Pynthorumkhrah Golflink ba thmu shna Children’s Park ka Shillong Golf Club

Shillong, Rymphang, 02: Ka Dorbar Shnong Pynthorumkhrah Golflink ha ka sngi Thohdieng, ha ka jingïakynduh ïa u MLA ka Pynthorumkhrah Constituency u Bah Alexander Laloo Hek ka la pynpaw ïa ka jingpyrshah kaba jur lada ka Shillong Golf Club (SGC) kan pynïaid ïa ka Children’s Park bad ïa ka jaka ïalehkai Futsal kaba yn sa shna noh shen.
Ha ka jingïalang, u Rangbah Shnong ka Pynthorumkhrah Golflink Bah Micheal Hek ha ka jingïakren bad u MLA u la pynpaw ba lada pynïaid hi da ka tnad Jngohkai Pyrthei ka Sorkar Jylla ka Dorbar Shnong kan ai ka jingïatreilang hynrei lada jia ba la aiti ban pynïaid sha ka Shillong Golf Club ka Dorbar Shnong kan pyrshah namarba kan long tang kum ka jaka kamai pisa jong ka Club.
Ha ka jingïakren bad ki lad pathai khubor, u Bah Micheal Hek u la ong ba lada ka Sorkar ka shimti ban pynïaid hi ruh ka dei ban pyntikna ba ki khun samla jong ka shnong kin ïohkam ïohjam.
“Ha ka jingshisha ngim don jingtip ba kin buh ïa ka Park, dei ki nongkitkam shnong kiba pyntip ïa nga bad ki la pyntip ruh ba dei ka Golf Club kaba la phah ïa ka jingtyrwa sha ka Sorkar kaba la mang ruh ïa ka skhim ban shna ïa ka Park. Mar mar ngi la lum ïa ka jingïalang bad ngi la phah da ka jingthoh sha u Myntri Rangbah Conrad K. Sangma, sha u MLA Bah AL Hek bad sha u Myntri ka tnat Jngohkai Pyrthei Bah Paul Lyngdoh bad sha u Commissioner & Secretary ka tnat Jngohkai Pyrthei u Vijay Kumar,” ula ong.
“Ka long kaba sngewsih ba kat kane ka jingthmu kaba heh, hynrei ka shnong kam don jingtip eiei. Ka long kaba sngewlehrain wat ïa ka Executive Committee jong ka Shnong. U MLA ula pynshai ba ka jingthmu ka long ban shna ïa ka madan Futsal bad ka Children’s Park,” la ïathuh u Bah Michael Hek.
U la ïathuh ba u MLA u la pynshai ba kan don ruh ka jingïateh kular hapdeng ka shnong bad ba ka shnong kan ïoh jngmyntoi bad yn aikam ruh sha ki samla jong ka shnong.
“Nga la kren shai u MLA ban ïatreilang bad ka Sorkar kam don jingeh, lada ka pynïaid ka Sorkar kan don ka jingmyntoi ïa ka shnong. Nga la kren pyrshah ïa u MLA ba lada ka pynïaid ka Golf Club ngin pyrshah bad lada ka kam trai ïa kane ka jaka bad lada ka pynïaid hi ka Golf Club, ka shnong kan pyrshah beit,” la ong u Rangbah Shnong.
Haba pynpaw shuh shuh ïa ka jingpyrshah ban aiti ïa ka jaka sha ka Shillong Golf Club, u Rangbah Shnong u la ong, “ka Golf Club ka la pynkylla ktem kamai nangne na ka madan Golflink. Ki wan ki Director ban ïakren na ka bynta ban ker noh da ka jar nar namarba madan ka la sdang ban jot.”
“Nga la ong ruh ïa u Director ka Golf Club ba u dei ban aikam noh hapoh 30 ngut ïa ki khynnah samla jong ka shnong bad ban thep kam ïa ki khynnah napoh ka shnong ha kaba u Director u la kular ban aikam ryngkat ka tulop kaba 10 hajar shi bnai. Ynda ki rangbah dong ki la ai ïa ki aplikeshon jong ki khynnah samla ban thep kam, katba ka jingsiew tulop ka long tang T. 4-5 hajar. Na ka liang jong ngi hi, ngim treh ban ïatreilang bad ka Golf Club lano lano ruh, shisien u briew uba la thok, dei na kata ka daw,” la kynnoh u Rangbah Shnong.
U la maham ruh ba ka Shillong Golf Club ka leh ïa kano kano ka kam nangne shakhmat ka dei ban da pyntip sha ka Dorbar Shnong hynrei lym kumta ïa ka jingkhrong pisa ban rung sha madan GolfLink ka Dorbar Shnong kan leit ban khang noh.
“Ka Shillong Golf Club kam dei ka Society ne ka NGO kaba ïarap ïa kino kino hynrei ka dei tang kaba shu kamai shimet,” la kynnoh shuh shuh u Rangbah Shnong bad maham, ‘wat pynlong ktem kamai pisa napoh ka shnong.”