Shillong, Rymphang 02: Ka Kynhun Myntri ha ka sngi Thohdieng ka la mynjur ban thaw ïa ka State Human Development Council (SHDC) ban pyntreikam ïa ka Multisectoral Project for Adolescent Wellbeing, Empowerment and Resilience (MPOWER) ha ka jylla.
Haba ïakren bad ki lad pathai khubou Symbud Myntri Rangbah, Bah Prestone Tynsong u la ong ba ïa ka SHDC yn khlieh da u Myntri Rangbah ka Jylla Conrad K Sangma katba u Chairman jong ka State Executive Level un dei u Chief Secretary ka Jylla katba ki Deputy Commissioner kin dei ki khlieh jong ki District Level Committee ban pyntreikam ïa kane ka prokram ba thymmai jong ka Sorkar Jylla.
La ïathuh ruh ba kane ka projek kan pynkhlaiñ ïa ka jingtreikam jong ka jylla naka bynta ban pynkupbor ïa ki samla lud kynthei bad shynrang kiba don hapdeng ka rta kaba 10 haduh 19 snem ka rta ha ki liang baroh la ka long naduh ba ki don ha skul haduh ba kin nang ban trei ïa ki kam ki jam.
Ka thong jong kane ka projrect ka long ban kyntiew ïa ka longbriew man briew bad pynkupbor ïa ki samla lud nalor ban pynkhlain ïa ka jingtbit treikam jong ki khnang ba kin lah ban synniang pura sha ka jingkiew ka ïoh ka kot jong ka Jylla.
Ha kajuh ka por u la ong ruh ba kine ki sienjam ba la shim da ka sorkar kan peit ruh kyrpang na ka bynta kito kiba don ha ka rta kaba 0-9 snem ka rta ha kaba ka jingkylla ha ka bor jabieng ka dang treikam bha.
“Lyngba kane ka projek ha ka kyrteng jong ka MPOWER ka sorkar kan pynleit jingmut kumno ban peit ïa ka jingkylla ha ka bor met bor phet bad bor jabieng jong kito ki heprit bad ruh ban pyntikna ba ka sap kaba ki don 9 snem shajrong kan neh namar naduh katei ka rta ki la sngewthuh kaei kaba ki kwah bad kawei kaba ki sngewtynnad,” u la ong.
Shuh shuh u ong ba lyngba kane ka sienjam ka sorkar kan peit ba kin lah ban buddien naduh baki dang don 0-9 snem bad ruh naduh ka rta kaba 9 haduh 18 bad 19 snem ka rta.
“Ka jingkwah jongngi ka long ban pyntikna ba ki nongshong shnong naduh ba ki dang rit kin ïoh ïa ka jingsumar la ka long ha ka bor met bor phad kumjuh ha ka bor jabieng bad ka sorkar kan buddien naduh ba ki dang rit ban tip ïa ka jingtbit bad ka jingsngewtynnad jong ki ha ka lawei ban sa wan,” bynrap biang u Symbud Myntri Rangbah.
