Shillong, Rymphang 02 : Haduh palat 500 klur tyngka ka pisa ka dang sahkut lyngba ka 15th Finance Commission ban pyllait sha ki lai tylli ki Autonomous District Council na ka daw ka jingslem ban phah ïa ki utilization certificates (UCs).
Ïa kane la ïathuh da u Symbud Myntri Rangbah ka jylla ba dei peit ïa ka tnad District Council Affairs hadien ka jingïalang bad ki CEM jong ki lai ADC kata naduh ka KHADC, JHADC bad na GHADC ha Secretariat ha kane ka sngi Thohdieng.
“Ka pisa kaba dang dei ban pyllait sha ki district council ka dang sah sa kumba 500 klur tyngka ei ei,” ong u Symbud Myntri Rangbah haba kren bad ki lad pathai khubor hadien ka jingïalang.
La ïathuh ruh ba na ka liang ka sorkar ka la bthah ïa baroh ki district council ba kin phah noh ïa ki UC la kumno kumno ha ka taiew ban wan.
“Hadien kane, ngin sa phah pat sha ka sorkar India katba ni dang ap ïa ka jingpyllait pisa ha ka sien kaba ar jong ka 15th Finance Commission ban pyllait sha ki ADC,” u la ong.
Haba jubab halor ka jingkylli, u Bah Prestone u la ong ruh ba ka daw ka jingslem ban phah ïa ki UC kadei namarba ka sorkar India ka la pynmih da ka rukom treikam kaba thymmai kata da kaba pyndonkam da ki portal kumta ka shim shibun bha ka por.
“Ym tang kata, hynrei ki don ki shong kiba ym paw kyrteng satia ha ka portal kumba haba pyrshang ban pynrung (upload) kam leit satia bad shah kyntait. Nalorkine ngi tyngkhuh ruh haba ïadei bad jaka ba hap ha ka Rural bad Urban namar don ki prokram kiba pyntreikam da ka Municipal lane da ka Urban Affairs Department. Kumta kine ki dei ki ishu kiba donkam ban pynbeit bha la ka long bad ka Urban Affairs Department lane ka C&RD Department lane ka PHE lane lyngba ka District Council bad DCA Department,” u la ong.
