Ïap biej ki nongjngohkai pyrthei na Russia ïa ka jingithiang ka Wah Lukha

Khliehriat, Rymphang, 02: Hapdeng ka jingiphuh iphieng la plie ïa ka tamasa Lukha Festival kaba saw harud ka wah Lukha, Sonapyrdi, East Jaiñtia Hills District ba la pynlong da ka Sonapyrdi Tourism and Economic Development Society (STEDS).
Ïa kane ka tamasa ka ban sa pynkut ha ka sngi Saitjaiñ la plie paidbah da u MLA/MDC Mawhati Constituency Bah Charles Marngar uba la long kum u kongsan.
Haba kren kum u kongsan, u Bah Charles u la ïaroh ïa ka jingitynnad jong ka jaka ha ka thaiñ Sonapyrdi bad u la kyntu ïa ki karkhana dewbilat kiba don ha kane ka district ba ki dei ban shimkhia ban kyntiew ïa kane thaiñ, .
U kitbok kitrwiang ïa ka STEDS ba kan nang kiew shaphrang bad u la aiti ruh ïa ka song pisa T. 1 lak ha u President ka STEDS, u Bah K.S.Suchiang kum ka jingai sngewbha ba la phah u MP ka Lok Sabha u Bah Vincent Pala namar ka jingbym lait por ban wan ïashim bynta ha kane ka tamasa.
U Bah Marngar u la ong ba ka thaiñ Narpuh ka dei kaba la kyrkhu da u Blei. Ka rilum Jaiñtia ka don ïa u dewiong, ka don ïa u mawshun, ka don bun ki karkhana bad kumta dei ban pyndonkam hok ïa kaba u Blei u la ai. Ngi don ka jingkyrmen ba ha kawei ka sngi ka Sonapyrdi kan ïoh ïa ka nam kum kawei na ki jaka jngohkai pyrthei kaba itynnad haduh katta katta lada ki paidbah ki ai jingïatreilang.
U la kyntu ruh ïa ki paidbah ba ki dei ban pynpaw pyrthei ïa kiei kiei kiba pher kum ki jait jingbam Pnar, ki jait tiar ba shna hi kiba na ka thaiñ namar lada remdor katno katno ruh kam pher namarba kiba wan jngohkai pyryhei kin thied beit tangban pyntikna ba dei ban lah ban ai da kaba bha tam.
U la kular ruh ba kum u MLA bad kiwei kiwei ki MLA kin sa ïakren ha Iingdorbar Thawaiñ ban kyntiew ïa kane ka thaiñ.
U Deputy CEM ka Jaiñtia Hills Autonomous District Council Bah Lasky Rymbai haba kren kum u Symbud Kongsan u la ong ba ka long kaba donkam ban ri bad sumar, ban ïada ïa ki khlaw ki btap, ki lum ki wah.
“Nga sngewsih ba ka JHADC kam ju lah ban kyrshan lem na ka daw ka jingduna pisa,” u la ong.
U la kyntu ïa ki nongshong shnong ba ki dei ban don ïa ka mynsiem ïatreilang, ban lehkhuid, ban don ka mynsiem ïatylli ha baroh ki liang bad ha kajuh ka por u la kynutu ruh ïa u heh jong ka Star Cement, u Devender Bansal ba un ai lem ïa ka jingkyrshan manla ka por ïa ka Society ba kaba kum kane ka tamasa kan long kaba phuh ba phieng manla u snem.
U Management Representative jong ka Star Cement, u Devender Bansal, u la ong ba ki nongïalam jong ka STEDS ki dei kiba trei shitom ban kyntiew ïa ka thaiñ.
“Nga sngew kmen ba nga la ïa don bynta lang ha kane ka tamasa,” ong u Bansal da kaba ïaroh ïa ki nongïalam kum u Bah Daïapherbha Lamare, u Bah K.S.Suchiang, u Bah Tacmon Gympad kiba ju shimkhia bad trei shitom ban kyntiew ïa ka thaiñ bad pynitynnad ïa ka jaka ha kaba ki briew ki ju sngewtynnad ban wankai sha kane ka jaka ha ka wah Lukha.
U la kular ruh ba un pyrshang ban ïakren bad ki dkhot ka DMF ban pynitynnad shuh shuh ïa kane ka jaka khnang ban dup khring shuh shuh ïa ki nongjngohkai pyrthei.
U President barim ka STEDS Bah Daïapherbha Lamare haba ai jingkren, u la ong ba uweipauwei u dei ban don ka jingkitkhlieh ban wanrah ïa ka jingkylla ban pynbha ïa ka mariang ban tyngkai ïa ki sawdong sawkum kiba don sawdong kane ka khlaw Narpuh Wildlife Sanctuary.
“Ka STEDS ka don ïa ka thong ban pynkhie im ïa ka wah Lukha bad ban kyntiew ïa ka kam jngohkai pyrthei ha Sonapyrdi bad ïa ka thaiñ hi baroh kawei,”u la ong bad bynrap, “kum ka Society ka la ïakynduh shibun ki jingeh ha kaba ïadei bad kane ka wah Lukha bad ha ki snem ba la leit la ïohlad ban pynkhuid ïa kane ka wah lyngba ka skim na ka DMF kaba T. 2 klur tam.”
“Nga kyrpad ïa u Bah Chales Marngar bad ïa u Bah Lasky Rymbai ba kin sngewbha ban ïarap lem bad ïakren lem halor ka mat ban pynim bad pynneh pynsah ïa ka wah Lukha,” la kyrpad u Bah Lamare.
Ha kane ka tamasa la wan sakhi da ki nongjngohkai pyrthei na ka ri Russia kiba la pynpaw ka jingsngewtynnad jong ki haba ïohi ïa ka mariang ba itynnad ha Sonapyrdi bad ki la ong ruh ba kin sah haduh ban da kut kane ka tamasa.
Kine nongjngohkai pyrthei kiba wan na ka ri ri Russia ki thmu ban leit sha Silchar, Assam hynrei ynda ki ïoh ïa ka jingphuh jingphieng ka tamasa ki la sangeh noh ha Sonapyrdi bad hiar sha ka wah Lukha bad ïashim bynta lang ha kane ka tamasa.
Kiba la ai jingkren ha kane ka sngi ki kynthup ruh u u Waheh Shong Sonapyrdi Bah Edimon Lamare, Bah Apmon Pashiang, Waheh shnong Moolamylliang, u Bah Grimlang Dkhar bad kiwei kiwei.
La pynkupburom ruh ïa kiba la ïashim bynta lang ha ka jingïaid kaba lai sngi lynter sha u lum Bahbo Bahkong kaba long ka jingïaid kjat da kaba rung ïa ka khlaw Narpuh Wildlife Sanctuary kaba la pynlong da ka Sonapyrdi Tourism Ecomonomic Development Society (STEDS) ha ka 23 tarik, 24 tarik bad 25 tarik Naiwieng 2023.
La pynbyrngiah ïa ka prokram da ki jingshad na ki samla bad ki longkmie ka shnong Sonapyrdi.