Jowai, K’Lyngkot 25: Ka Movement For Change Meghalaya India, kat kum ka kyrwoh bala phah da u President u Pherdian Samaiang bad u Chandame Sungoh kum u nong aiktien lane u spoke-person jong ka kila pynrem jur ïaka Sorkar MDA-2 ba lam khmat da ka NPP hapoh ka jingïalam jong u Conrad Sangma kum u Chief Minister halor ka jingweng kam shiteng por bad khlem nongrim ïaki officers ka Lokayukta.
Ka Movement lyngba u nongai ktien jong ka ka ong ba ka jing beh kam ïa kine ki officers ka dei tang ka buit bymman jong u Conrad Sangma khnang ban ïada ïaki ba ha ïing ha sem jong u kiba la shah charge sheet naka daw ka jingbam sap ba shyrkhei jong ki hapoh Garo Hills Autonomous District Councils.
Ka sorkar ka pynksan ïalade da ka ba ong ba ka jingweng kam ïakine ki Officers ka dei kat kum ki kyndon aiñ jong ka Lokayukta Act namar ba ka aiñ kam shah ïaki officers bala shong thait ban long kum ki member jong ka bad ki ong ruh ba da ka ba thung da ki officers kiba dang trei te ka pynduna ïaka jinglut jongka sorkar namarba kam donkam shuh ban pynlut ha ka ban siew tulop ïaki. Kine ruh ki long kiba bakla, namar ka aiñ kam ong ba ym bit ban thung da ki officers bala shong thait.
Ka jingong jong ka sorkar ba lada thung da ki ba dang don ha ka jingtrei te kan pynduna ïaka jinglut jong ka sorkar namarba ym donkam shuh ban siew tulop yaki. Ka long tang ka jing pynbeij paitbah, haba ka sorkar ka don pisa ban thung ïaki to ki officers bala shong thait sha ki wei pat ki department lane kum ki advisors ïaki to ki MLA bala rem election bad pynlong ïaki tamasa te balei iakine pat kam don? Buh jingkylli ka Movement.
Lada thung da ki officers kiba dang don ha ka kam te kim long laitluid ban kylli ban tohkit namaba ki hap ban bad tieng bad kohnguh ïaki ba kham halor jong ki lane ki minister. Ka jingweng kam ïakine ki officers bad ka jingthmu ban thung da ki wei ka dei ka buit bymman jong ka sorkar ban ïada ïaki briew jong u Conrad, ong shuh shuh ka Movement.
Ka jingkren jong u Conrad, naduh ka por ba thung ïakine ki officers ruh ym shym la bud kat kum ki kyndon aiñ. Namar ha ka aiñ la ong ba dei ban rhung tang kiba bat ïaka kyrdan Secretary ha ka jylla lane kiba pass IAS. Hato ha ka por ba thung ïa kine ki officers kim don seh ki ba long Secretary hapoh ka jylla Meghalaya, lane ym don seh kiba pass IAS? Bad balei la thung khlem da bud ïaki kyndon? Buh jingkylli ka Movement.
Ka Movement ka pynrem ruh ïaki bor pynïaid jong ka District Administration, West Khasi Hills namar ka jing pynjari khlem shong ñia ïaka 144 CRPC ha ka por baka VPP ka mut ban ïakhih da ka ba jai jai halor kane ka issue.
Ka 144 CRPC kam dei ka aiñ ban khang ïaki jingïalang paitbah kiba ïakhih da ka lynti ka aiñ. Lane ka 144 CRPC kam dei ka aiñ ban pyntrei kam haba wan ki heh ki haiñ. Ka jing pyntrei kam ïaka 144 CRPC ha ka ne ka sngi ka dei tang ka jing kohnguh jong ki DC bad Magistrate ïaka jing ong jong ka sorkar.
Ha ka jingshisha kum ki DC ki Magistrate ki IAS, IPS ki dei ban long pdeng lane kim dei ban shah shiliang ïano ïano ruh, hynrei kaba sngewsih ka long ba bun naki DC, Magistrate kiba shuh long niang kohnguh ha ki lei sansnem khlem da bat ïaka kyrdan bad ïaka bor ka iktiar jong ki.
