Jowai, Nailur 22: Ki dkhot ka West Jaiñtia Students’ Union (WJSU) mynta ka sngi 22 tarik u Nailur haka por 5:46 baje mynstep kila ïoh kem ïa ki 11 ngut ki nong Bangladesh bad uwei u Dalal na Lad Amtapoh kaba hap hapoh ka Amlarem Sub-Division West Jaiñtia Hills District.
Ïa kitei ki nong Bangladesh la ïoh kem katba ki dkhot ka seng ki dang pynlong ka jingjurip ïa ka leit ka wan jong ki kali kiba kit ïa bar jylla ha u surok Amlarem-Dawki, hadein bala tip ïa kane mar mar utei u Dalal uba pynkit ïa ki da ki kali ula phah pynhiar noh ha shiteng lynti bad phah leit rieh ïa ki shapoh khlaw, ynda la ïoh kem ïa utei u Dalal da ki dkhot ka seng ula phla ba kitei ki nong Bangladesh ki don shapoh khlaw.
Hadien bala ïoh kem ïa ki baroh ka seng kala leit ujor ban register kes ha Amlarem Police Station pyrshah ïa kitei ki 11 ngut bala ïoh kem napdeng kine 4 ngut ki shynrang, 1 khynlung shynrang ba dang 4 bnai bad 6 ngut ki kynthei kiba thmu ban wan rung tuh shapoh ka Ri India khlem ki kot ki sla ba biang.
Ha ka jingtohkit bniah kitei ki nong Bangladesh kila ïoh lad ban rung tuh na ki bynta khappud jong ka Dawki, la lap dien ruh ba utei u Dalal na Sohmynting uba la donkti ban pynïaid tuh ïa kitei ki Dkhar Bangla bad ïa u ruh la aiti sha ki pulit ban ïoh leh ïa kaba donkam.
Na ka liang ka seng ka la pynsngew kane ka jingrung beaiñ jong ki nong Bangladesh shapoh ka Ri India lyngba ki jaka khappud jong ka thaiñ War Jaiñtia kala jur bha mynta katba nang mih ki sngi. Ka seng kan dang ïai bteng ïa kane ka kam da ka jingïatrei lang jong ki pulit bad ki nongshong shnong ka thaiñ ban khanglad ïa kane ka kam rung tuh jong ki briew kiba nabar ri.
