Ki briew kiba don jingduna dkhot met ki donkam ïa ka jingburom ym ïa ka jingisynei: Chief Justice

Shillong, Nailur 22 : Ka Chief Justice jongka ïing Bishar High Court jongka jylla ka Revati Mohite Dere mynta ka Sngi Ba ar ka la ong ki briew kiba don ka jingduna ha ki dkhot met ki donkam ïa ka jingim ba laitluid, ka jingburom ym ka jingisynei bad kita ki jinglong jingim ha ka imlang sahlang kaba ju leh klet ïa ki hok jongki bun bun sien.
Ka ïing Bishar High Court ha ka jingïatrei lang bad ka ophis jong u Commissioner for Persons with Disabilities Meghalaya, Vidhi Centre for Legal Policy and Mission Accessibility, New Delhi, ki la pynlong ïa ka prokram ba kyrpang halor ki hok jong ki briew kiba don jingduna dkhot met kat kum ka Rights of Persons with Disabilities (RPwD) Act, 2016, kaba long ruh kum shibynta ka jingbud pyrkhing ïa ki hukum ba la bthah da ka ïing Bishar Supreme Court.
Haba kren ha ka jingïalang ka Chief Justice ka la ong ba ïa ka RPwD Act la thaw ban ïada ïa ki hok bad burom jong kine ki briew kiba don ki jingduna ha ki dkhot met ban ïada iïa ki na ka jingshah peit poh, ban pynïaryngkat kyrdan ïa ki kumba long kiwei bad kumno ban pyntreikam hok ïa kane ka aiñ ban ïada ïa ki. Ka la ong wat hapdeng ki jingpynmih hukum jongka ïing Bishar Supreme Court kine ki briew kiba don jingduna ha ki dkhot met ki dang ïakynduh ïa kiba bun ki jingeh namar ym shym la pyntreikam pyrkhing ïa kine ki aiñ ki kyndon. “ Ha ka jaka ba ai mynsiem ïa ki ba kin im laitluid ngi pyrshang ban long ki dieng pyngkiang na ka bynta jongki da kaba leh klet ïa ki hok bad jingdonkam jongki” ong ka Dere.
Ka la ban jur ïa ka jingdonkam ban ai jinghikai naduh ba sdang ïa ki briew kiba tbit naduh ki engineer, ki nongsaiñdur bad ki ophisar ban ai jinghkai ïa ki ha kiba bun ki bynta naduh kaba sdang hi ba kin long kumba ïalong lang kiwei ki para briew.
Ka la ong ba ki ophisar ki dei ban peit ïa kine ki jingdonkam ym ban pyntreikam tang namar ba don ki aiñ. Donkam ban thaw kyrpang na ka bynta jongki naduh ki skul, ki college, ki ophis bad kiwei kiwei ki tnad ban ïarap ïa kine ki briew ba don jingduna dkhot met ba kin ïoh ïaid laitluid bad leh laitluid.
“ Kine ki briew kin kiew bad poi sha kliar tang lada baroh ki jaka pule naduh jong ki kynhun ne riew shimet haduh jongka sorkar ki shim khia na ka bynta jongki. Kumta ka khot bad ïawer ban pynbeit ïa kane khnang ba kine ki briew kiba don jingduna ha ki dkhot met kin ym shaniah shuh hano hano hynrei kin ïoh ban ïaid bad leh laitluid ha la ka mon bad ba kim don kano kano ka jingsngew ha ka imlang ka sahlang ruh.
Kiwei kiwei kiba ïadon lang ha kane ka jingïalang ki long u Commissioner and Secretary ka tnad Social Welfare u Pravin Bakshi, Justice HS Thangkhiew, Justice B Bhattacharjee and Justice W Diengdoh, Judges of the High Court ka Meghalaya, lem bad kiweik iwei ki ophisar na ka tnad pulit bad social welfare.