Shillong, K’Lyngkot 17 : Ka Bharatiya Janata Party (BJP) Meghalaya ka pynkhreh ban kynduh markhmat bad u Myntri Kampohiing ka Ri, u Amit Shah bad ban pynkynmaw biang ïa ka mat dawa Inner Line Permit ha ka jylla nalor kiwei kiwei ki mat kiba kham kongsan ha ka jylla.
“Kum ka party ngin sa rah bun ki mat kiba ïadei bad ka jylla kiba dang sahteng haduh mynta kum ka mat dawa Inner Line Permit, ka jingdawa ai jingithuh noh ïa ka Ktien Khasi ha ka Khyrnit kaba Phra bad shibun kiwei pat kiba kum ka party kan sa rah ha khmat jong u (Amit Shah),” ong u nongai ktien ka BJP haba kren bad ki lad pathai khubor.
Katkum ka jingong jong u, na ka liang ka party kaba don ha ka bor synshar ha ka sorkar pdeng ka shim ïa kane ka kabu ban tynruh lang ïa ki ishu kiba dei na ka bynta ka jingmyntoi jong ki paidbah ka jylla kiba donkam ïa ka jingtuklar jong ka sorkar pdeng na Delhi.
Ha kajuh ka por u la pyntip ruh ba haduh mynta na ka liang ka party kam pat rai ne jied ïa ki kyrtong kiban aireng ha kane ka elekshon MP na Shillong bad kumjuh na Tura Parliamentary Seat.
U Bah Kharkrang u la ïathuh ba ha Shillong haduh mynta ki la don lai ngut kiba pynpaw ba ki kwah ban aireng, kata kynthup lang ïa ka Kong Finela L Nonglait kaba la pynpaw ba ka kwah ban aireng na ka tiket jong ka party na Shillong seat.
“Ka party kan jied ïa u lane ka briew kiba don ka jingkyrmen ban ïoh ïa ka jingjop, bad ïa ka kyrteng jong ki kyrtong yn phah sha ki nongïalam ka party ha Delhi ban ai jingmynjur hadien ba la bishar bniah bha,” u la bynrap shuh shuh.
