Lehkmen ka Balang Pynter ia ka sngi kha ba 75 snem u Phadar Norbert
![](https://mawphor.com/wp-content/uploads/2022/05/mawphor-1-2.jpg)
Shillong, KLyngkot 15 : Ka Balang Catholic jong ka shnong Pynter kaba hap hapoh ka Parish Nongshyrngan, ha ka sngi u Blei jong ka 14 tarik ka la pynlong ïa jingrakhe ia ka lyngkhuh sngikha kaba 75 snem u Lyngdoh sohblei uba dei na katei ka shnong u Rev Father Norbert Nodren Nongrum.
Ha kane ka sngi u Phadar Norbert u la tyrwa ia ka kñia ka khriam jong ka Mass Bakhuid ha ka por mynstep ha ka jingsynran lang kiwei pat ki Lyngdoh sohblei ba kynthup ïa u Phadar Parish Priest ka Nongshyrngan u Rev Father Robert Khyriem, nangto u Rev Father Bajenstar Khongjee, u Rev Father Bensar Kharsati ha ka jingshim bynta shit rhem ki paid riewngeit.
Haba sneng ïa ki paid riewngeit u Sohblei Norbert u la ong ba kumba u Blei u la phah sha ka pyrthei ïa u briew ban kamai ïa ka hok kat kum ka hukum ka dei ka kamram jong man la uwei pa uwei ban leh ïa kata.
Haba pynkynmaw ïa ka jingieid jong u Blei u Sohblei Norbert u la ong, “Nga dei tang u khun swet ba duk bad ba shem lanot haduh katta katta hynrei ka jingieid bah jong u Blei u la phah ïa ki Phadar Phareng ban wan sha ka shnong jong nga bad ban shim jingkit klieh ban pynheh pynsan ïa nga ryngkat ka phah skul tad haduh ba nga long u Lyngdoh sohblei jong ka kur mynsiem Catholic bad ki kam phylla ki jong u Kynrad ki ïai jia haduh kine ki sngi bad ym shuh tang ha ka jingim jong u hynrei ha ka jingim jong man la uwei pa uwei.”
Ha ka por noh sngi la pynlong ïa ka prokram leh burom ïa u Sohblei Norbert Nodren Nongrum ha kane ka lyngkhuh sngikha da ki program jingrwai na u Wanjop Sohkhlet uba dei na kane hi ka shnong, ka jingtem sur na ki samla ka balang catholic Pynter, ka jingshad jingrwai bad kiwei kiwei.
Haba kren ha kane ka sngi u Fr Norbert u la ai burom ïa ka balang shnong kaba la pynkhreh ïa kane ka program kaba shongkun bad u la ïathuh ruh ïa ki sngi jinglong khynnah lyngba ka sur jingrwai kiba u ju rwai ha ka por ba u dang samla.
Ha kane ka sngi u la wan shim bynta lang ban kitbok ïa u Sohblei Norbert Nodren Nongrum ba un nang koit nang khlaiñ da u MLA ka North Shillong u Bah Adelbert Nongrum, u Sordar ka Raid Shabong u Bah Herin Kongngai, ki nongïalam shnong ka Pynter bad kiwei kiwei kiba la shah khot sngewbha.
Ha kane ka sngi u Fr Norbert u la ïoh ruh ban ot ia u cake ïa uba la ai sngewbha da u paralok ba ieid eh jong u u samla Wanjop Sohkhlet.
Ha kane ka sngi ka balang catholic Pynter ka la pynspong ruh da ka jain khor ïa u Sohblei Norbert kum ka dak ka jingburom ïa ka kyrdan kñi ha ka kur mynsiem Catholic.