Nongstoiñ, K’Lyngkot, 15: Ka Nongstoiñ Diocese Catholic Youth Movement ha ka sngi u Blei ka la pynkut noh ïa ka lympungbah jong ki samla ïa kaba la tip ruh kum ka XV Annual Diocesan Youth Covention kaba la sdang ruh naduh ka sngi Thohdieng jong ka taïew ba ladep.
Ïa kane ka lympung kaba kyrpang jong ki samla ka Balang Katholik ka Jyllaniam Nongstoiñ la pynlong ha Mother of Compassion Mawkhlam Parish.
Ha kane ka sngi pynkut ïa ka Convention ha ka por 9:30 mynstep la pynmynta ïa ka Mass Bakhuid da u Bishop jong ka Jyllaniam Nongstoiñ u Most Rev. Wilbert Marweiñ .
Ha ka por nohphai sngi pat pynlong sa ïa ka jingmane ïa ka Sakrament Bakhuid da u Fr. Alfred Lyngdoh Nongbri na ka St.Xavier’s Minor Seminary Upper Shillong.
U Bishop haba sam ïa ka Ktien jong U Blei u la ong,”ba ka met jong phi ka long ka tempel jong u Blei kumno samla phin leh ban lait na ki jingpynjakhlia ïa ka ïing U Blei, hato phi ïohsngew neem ïa ka sur jong U Blei kumba u Samuel u la ïohsngew bad u la pynleit jingmut ban shah shkor bha ïa ka jingkhot, ka jingkohnguh ïa la ki kmie ki kpa ruh kadei ka jingkohnguh bad ka jingpynsngewbha ïa U Blei.”
Ïa kine ki kyntien la sot ban pynshong nongrim lyngba ka kitab kaba nyngkong u Samuel, na ka shithi kaba nyngkong u Apostol Paulus sha ki nong Korinth bad na ka shithi sha ki nong Ephesus kaba long ruh ka mat pdeng jong ka Convention kaba ong ruh “Phi ki khun, to kohnguh ïa la ki kmie ki kpa ha U Trai, namar kane ka long kaba phi dei ban leh.”
Ha kane ka sngi la sakhi lang ruh da u Rev Fr. Nicholas Maïong MSFS Parish Priest ka Mother of Compassion Parish Mawkhlam, u Fr.Joby Mathew, u Alvin Savio Kharkongor uba la wan na sor Shillong uba dei u President jong ka SACYM, ki Phadar na nongbah Tura, ki sister bad ki samla.
Kane ka lympungbah kaba la neh haduh 3 sngi lynter la pynlong ïa ka jingïalehkmen da ki jingpynbyrngia bapher bapher, ka jingai jinghikai na ka Ktien jong U Blei bad ki Seminar.
