Shillong, K’Lyngkot 15: Ka Prof Badaplin War ba dei ruh ka longkmie ba la shah pynkup burom da ka nam Padmashri ha ka sorkar pdeng ha ka sngi Saitjaiñ ka la ong ba ki samla ki dei ban da thew da woh bha ha shwa ba kin shim ïa kano kano ka rai ha ka jingim.
ïa kane ka Padmashri Badaplin ka la kren ha ka jingpynhap pyrda ïa ka tamasa ïalehkai phutbol ha Lummawbah ban kynmaw burom ïa u MP barim ka jylla, Ma Jerlie E Tariang ba dei ruh u kpa jong ka uba la khlad noh ha u Iaiong 2015.
“Kum ka longkmie bad kum ka nonghikai nga don ka jingïadei kaba jan bha bad ki samla. Kumta, kum ki samla nga ngeit ba shwa phin shim ïa kano kano ka rai phi dei ban da thew da woh bha ban long ki nongjop ha ka jingim,” ka la ong.
Shuh shuh ka la bynrap da kaba ong ba ki samla haba ki shim bynta ha kino kino ki lympung bunsien hi ki da pynkhreh ïalade la ka long wat ha ki kam ïalehkai ruh. “Phi hap ban da pyrkhat bha ba kaei ba phi leh ka ban tei ïa ka jingim. Wat ha ka jingim kaba man ka sngi ruh donkam ban don ka jingsngewthuh jingmut ba phin poi sha ka thong,” ka la bynrap biang.
Shuh shuh ka la kyntu ruh ïa ki samla ba ki dei ban don ka mynsiem ban kyrshan lang para samla. “Nga sngewkmen ba ngi ïoh ban kynmaw burom ïa i Pa lyngba kum kine ki prokram,” ka la ai khublei ïa ka Sainborlang Banjop Welfare Association kaba la pynlong ïa katei ka tamasa ïalehkai.
La donlang ha kane ka sngi naduh ki nongïalam ka Association, ki nongïalam shnong ka Lummawbah bad ruh ka Chairperson barim ka KHADC, Kong Teilinia Thangkhiew nalor ki riewrangbah bad ki riewtymmen jong ka shnong.
