Nongpoh,K’Lyngkot 15: Ka Shillong Archdiocese Catholic Youth Movement Zone-VI ha ka sngi Saitjaiñ ka la kyntiew ïaka lama kum ka dak ka jingsdang ïaka lympung ïa kynduh lang jong ki khun samla kaba latip kum ka Zonal Youth Convention kaba 5 halor ka phang “U dieng u ba bha um ju sei ki soh kiba sniew lymne u dieng uba sniew u sei ïaki soh kiba bha” Lukas 6:43 bad ïa katei ka convention yn pynkut pat haka 14 tarik Kyllalyngkot ha Lumsinai, Umden Parish.
Ïa Lama jong katei ka lympung Zonal Youth Convention kaba 5 la wan ban kyntiew da u bah Mayral Born Syiem, MLA ka Nongpoh, haka jingdon lang u Fr. Peter Syiemlieh, SYD, SACYM Zone VI, Fr. Michael Khongngaiñ, Parish Priest Umden Parish, Samla Benedict Maïong, President SACYM Zone VI lem bad kiwei kiwei ki nongïalam Balang bad ki khun samla jong ka Balang Catholic.
Ha kane ka sngi sdang jong katei ka lympung jong ki khun samla Catholic la wan ban tuid da ki spah ngut ki khun samla kiba la wan ban sah lypa naki 5 tylli ki parish kiba kynthup ïaka Nongpoh Parish, Umkadhor Parish, Byrnihat Parish, Umden Parish bad ka Umsiang Parish ban pynlong ïa katei ka jingkynduh lang kaba phuh ba phieng bad kaba jop.
Haba kren ha katei ka sngi naka liang u Bah Mayral Born Syiem kum u kongsan u la ai mynsiem ïaki khun samla ba ki dei ban long kum u dieng kedar uba don 3 tylli ki jinglong ba u dei u dieng u ba eh, uba beit bad u ba don ka jingsma iwbih ha kaba kum ki khun samla ki dei ban don ïa kitei ki jinglong ban eh bad skhem haka jingmut ban ïaid haka lynti kaba beit bad ban don ka jingsma iwbih bad ka jinglong ba bha ban pynphriang ruh sha kiwei pat ki khun samla.
U la ong ruh ba ha ka jinglong samla shibun ki jingpynshoi kin wan ban thap naka diang bad ka mon hynrei kum ki samla kiba tip ïa u Blei ki dei ban skhem haka jingmut ban ym hap lane ngop haki jingpynshoi hynrei ban pan bor na u Blei halor shibun ki jingeh bad ki jingpynshoi ba ki ïakynduh haka jingim jong ki.
