Shillong, K’lyngkot, 15: Ka Learning Links Foundation kaba dei seng trei mon sngewbha kaba trei na ka bynta ban kyntiew ïa ka jingpynsaphriang ïa ka jingnang jingtip, da ka jingkyrshan jong ka Intel Technology India Pvt. Ltd ha ryngkat ka jingïatreilang bad ka Directorate of School Education and Literacy (DoSEL), SSA-SEMAM jong ka sorkar Meghalaya ka la plie paidbah ïa ka Holistic Child Development Program kum shi bynta jong ka jingsdang ïa ka “Adopt a School” Program.
Ka jingthmu jong kane ka prokram ka long ban shut ïa ka jabieng jong ki khynnah khnang ba kin long kiba sted ban bat ïa ki jinghikai bad ki jingnang jingtip ba la batai ïa ki. Ïa kane ka prokram yn pyntreikam ha ki 10 tylli ki skul kiba hap hapoh ka Mawlai C&RD Block ha East Khasi Hills District bad ki khynnah ki ban ïoh jingmyntoi na kane ka prokram kin don shi hajar ngut kata naduh klas I haduh V.
Lyngba ka Holistic Child Development Program la khmihlynti ban ai jinghikai ïa ki khynnah ha kiba bun rukom kum ka jinghikai ba kin sumar ïa ka koit ka khiah lajong, ka jinghikai ba kin kilan met lane ba kin don ka jingsngewtynnad ha ki jingïalehkai sports nalor kiwei pat. Katto katne na ki mat kiba hap hapoh ka Holistic Child Development Program ki kynthup ïa ka :
Learning Enhancement: Hangne kin pyndonkam ïa ki rukom ai jinghikai ban nang pynkhlain shuh shuh ha ka jingpule jong ki khynnah bad ban pynrung ïa ka mynsiem ba kin don jingsngewtynnad ban wad jingtip ïa bun kiei kiei.
Health and Wellness: Hangne kin peit thuh man ka sngi ïa ka koit ka khiah jong ki khynnah, ka jinglah jong ki ban bam khnang ban pyntikna ba ki dei ban don ïa ka met kaba khlain.
Structured Sports curriculum through Khelo India: Yn pynshlur ïa ki khynnah ba kin ïa shim bynta ha ki jingïalehkai Sports khnang ba kin ïoh ïa ka met kaba shait ba khlain , ba kin sngewthuh ïa ka jingdonkam jong ka jingïa tylli ha ka kynhun kaba ki don bad ba kin sngewthuh ruh ïa ka kamram kum ki nongïalam.
Art Education: Yn pynshlur ïa ki khynnah ba kin pyni ïa ki sap kyrpang ba ki don , ba kin pyni ïa ka jingïar ka jingmut jingpyrkhat jong ki khamtam ba kin tip ïa ka jinglong tynrai.
Ka Learning Links Foundation ka sngew sarong ban ïoh ïa treilang bad ka Directorate of School Education and Literacy (DoSEL), SSA-SEMAM jong ka sorkar Meghalaya na ka bynta ban pynurlong ïa kane ka jingthmu bad ban pynïar ïa ki jingtreikam jong ka sha kiwei pat ki District ha ka jylla.
Ka Dr. Anjlee Prakash , Chairperson jong ka Learning Links Foundation ka la pynpaw ka jingsngewkmen halor ka jinglah ban plie ïa kane ka prokram bad haba pynpaw ïa ka jingsngewkmen jong i, ka la ong, “Ngi ngeit ba manla uwei pa uwei ne kawei pa kawei ka khynnah ki don ïa ka hok ban ïoh jingmyntoi na kane, kane ka dei ka jingthmu ba ym tangba ki khynnah kin ïoh ïa ka jingpule kaba thoh ha ka kot pule jong ki hynrei kin ïoh ruh ïa ka met kaba koit ba khiah bad ban ïoh jingtip ruh shaphang ka jingriewspah ka jinglong tynrai jong ngi bad bun kiei kiei . Da ka jingïatreilang bad ka Directorate of School Education & Literacy (DoSEL), SSA-SEMAM jong ka sorkar Meghalaya, ngin nang pynkhlain shuh shuh ïa ka jingangnud jong ngi ban wanrah jingkylla ha ka jingim jong ki khynnah”
Ka Learning Links Foundation ka dei ka seng trei mon sngewbha kaba aiti lut na ka bynta ban pynriewspah ïa ka jingnang jingtip bad ban ïalam lynti sha ka lawei kaba phyrnai. Naduh ba la seng ïa ka ha u snem 2002, ka la lah ban pynïar ïa ki thapniang treikam jong ka ha baroh kawei ka Ri India bad ha Asia Pacific ruh kumjuh. Ka Learning Links Foundation ka ai jinghikai ïa ki khynnah ym tang na ki kot pule jong ki hynrei ka saindur ïa ka jingim jong ki khynnah da kaba ai ïa kiwei pat ki jingtip ki bym shym la thoh ne batai ha ki kot pule jong ki.
Na bynta ki jingtip ba kham bniah shaphang ka Learning Links Foundation, phi lah ban peit ha kane ka Website [Website: https://www.learninglinksindia.org].
