Shillong, Nohprah 21: Ka Meghalaya Cricket Association hynne ka Sngi Hat Majai lyngba ka jingïamir jingmut ha ka Annual General Meeting, ka la ïoh ban wanrah shakhmat ïa ki jingthmu ban shim rai halor ban kyntiew ïa ka kriket hapoh ka Jylla.
Ha kane ka jingïalang la wan shimbynta baroh ki Association na ki District. U Secretary jong ka MCA, Shri Gideon Kharkongor, u la ïoh ban wanlam shakhmat ïa ki report na bynta u ne u snem, kaba la bud hadien ka report na u Treasurer ka synjuk, u Dhrubajyoti Thakuria.
ïa kane ka jingïalang la lamkhmat da u President ka Association-u Nababrata Bhattacharjee. Kiwei pat kiba la don ryngkat ha kane ka sngi ki kynthup ïa u Deputy Account General jong ka office of the Principal Accountant General, Meghalaya, ryngkat ruh bad ki dkhot nongkitkam jong ka Apex Council bad kiwei kiwei. Kawei na ki rai kaba la shim ha kane ka jingïalang ka long ban kynthup ïa ka Eastern West Khasi Hills District Cricket Association (EWKHDCA) kum ka synjuk kaba thymmai ban ïasoh bad ka MCA khlem ka jingïathep vote, ha kaba ka bynta ba hakhmat eh ka long ban ithuh ïa ki 11 tylli kiwei pat ki District Associations kum ki dkhot ba pura ha kine ki snem ban dang wan. La ïoh ruh ban thung ïa u Justice Aloke Chakrabarti, u nongbishar ba la shongthait na ka Allahabad High Court, kum u Ombudsman bad Ethics Officer jong ka MCA na bynta shi snem.
U President u la wanrah shakhmat ïa ka jingdonkam ban pynshlur ïa ki khynnah na ki district ban shimbynta ha ki grassroots level bad ruh ban pynbit pynbiang ïa ki jingtei bad ki jingdonkam ban kyntiew shaphrang ïa ka jingïalehkai kriket.
Shuh shuh, ka MCA ka la rai ruh ban plie ki shlem ai jinghikai kriket ha man ki district na bynta baroh Shynrang bad Kynthei ban kyntiew kham shaphrang ïa kane ka sport. Bad la pyntip ba kine ki shlem ai jinghikai kin kham pynleit jingmut ban pyntbit khamtam ïa ki khynnah kiba dang ha ki 8 haduh 15 snem. Dei ha ka rta ba 15 snem ba ki player ba kynsai ki ïoh ban shah jied ha ki district bad ruh ha ki kynhun ka Jylla, bad kin ïoh ruh ïa ka kabu ban sei madan la ka jong ka sap ha rynsan ïalehkai jong ki lympung BCCI bad ruh ha ki National Cricket Academy camps.
Na ka liang jong ka MCA kan trei shitom katba lah ban sei shuh shuh ïa ki coach, umpire, scorer, physio, trainer, lem bad kiwei kiwei ha ki district level. Ka State Association kan ïaid ryngkat ban kyrshan ïa ka grassroots cricket ba la pynkhreh na bynta ki districts, ban wad ïa ki khynnah ba don ïa ka sap, lyngba ka coaching camps, inter-school tournaments, bad kiwei kiwei.
