Nongpoh, Nohprah 04: Ka Ophis jong ka District Social Welfare Officer, Ri-Bhoi District haka 1 tarik Nohprah kala ioh ban rakhe ïaka sngi jong ki briew kiba don ki jingduna haki dkhot met ne ka International Day of Person with Diabilities 2023 halor ka phang “United in action to rescue and achieve the sustainable development goals for, with and by persons with disabilities” bala pynlong ha Bhoirymbong C&RD Block.
Ha katei ka jingrakhe bad kynmaw burom ïaki briew kiba don jingduna haki dkhot met, u Bah P Mukhim BDO ka Bhoirymbong C&RD Block u la shim bynta kum u kongsan haka jingdonlang ka kong NF Sun DSWO, ki ophisar naka tnad Social Welfare bad kiwei kiwei ki riew rangbah kynthup ruh kba don jingduna haki dkhot met. Ha katei ka sngi la pynlong ruh ka Medical Check Up naka bynta kiba duna haki dkhot met.
U Bah P Mukhim kum u kongsan haba kren ha katei ka sngi u la pynpaw ka jingsngewkmen hadien ba ka tnad Social Welfare kala shimkhia ban pynlong kum katei ka jait prokram khamtam ban kynmaw burom ïa ki briew kiba duna haki dkhot met ba ngim dei ban ñiew beiñ lane ibeiñ ïaki.
Naka liang u BDO u la pynshlur ruh ïa ki briew kiba duna haki dkhot met kiba la wan ha katei ka sngi ba kin pynrung kyrteng ïalade naka bynta ban ioh ïa u Adhaar namar khlem u Adhaar kim lah satia ban ioh ïaki skhim sorkar lane kino kino ki jingmyntoi ba ki lah ban ioh naka sorkar.
U la ong ruh ba lyngba ka ophis jong u BDO kito ki briew kiba duna haki dkhot met ki lah ban pynrung kyrteng ïalade naka bynta ka Job Card kaba kyrpang bad ka baibam naka sorkar bad lyngba katei ka Job card ki lah ruh ban ioh ïaki skhim ri jingri ha kaba naka liang u BDO u la khot bad wer ïaki ba kim dei ban lehraiñ ne ban don kano kano ka jingsngewpher bad ban pynïapher ïalade bad kiwei hynrei ki dei ban mih shakhmat ban long lem kum kiwei ban ioh jingmyntoi naka sorkar khamtam kito kiba don ka sap kyrpang haka liang ka sports bad kiwei kiwei, u la bynrap.
