Jowai, Nohprah 04: Ka Office jong ka District Social Welfare Officer, West Jaiñtia Hills District, Jowai ka la rakhe ïaka International Day of Person with Disabilities 2023 mynta ka sngi ka 4 tarik u Nohprah ha Syiem Jingsuk Secondary School, Lai Lyngdoh Hall, Amlarem Sub-Division, ha kaba u bah H. Pohthmi, MDC War West, Deputy Chairman JHADC ula long u kongsan.
Ka phang jong ka International Day of Person with Disabilities ha une snem ka long “United in Action to rescue and achieve the SDGs for, with and by persons with disabilities”.
Ïa kane ka programme la pynïaid da u ma E. Kyndait, LDA jong ka Office DSWO. La ai ka jingkren pdiang da ka kong R. Passah, DSWO ha kaba ila pynshai shaphang kane ka sngi ïa kaba la leh burom ha baroh shityllup ka pyrthei naka bynta ki briew kiba don jingduna haka dkhot met.
Kala ong ruh ba ka sorkar ka don ki scheme ba kyrpang na ka bynta kiba duna ha ka dkhot met, kumta kala kyntu ïa ki kmie ki kpa ba lada don ki khun kiba don jingduna ha ki dkhot met jong ki, ki dei ban leit sha ki Nodal Hospital khnang ba kin ïoh ïa Disability Certificate ban leit mih sha ki Office sorkar ban ïoh ïaka jingïarap naka sorkar.
Ha kane ka programme la ïoh ïaka jingkren na ka kong Aidiam M. Kassar, Psychologist Manager, DRCDA halor ka Scheme & Services for persons with Disabilities, na u ma L. Khonglah, Advocate Jowai Bar Association halor ka Right of Persons with Disabilities bad na ka kong P. Chyrmang, Office Assistant, ICDS, kumjuh na ka M. Lapasam, Mukhya Sevika, BDO Office.
U kongsan haba ai jingkren ula kyntu ïa kiba duna ha ka dkhot met ban long kiba shlur bad kiba trei shitom wat la ki don ka jingduna ha ka dkhot met. Ula kyntu ruh ïa ki longkmie longkpa kiba don ki khun kiba duna ka dkhot met ba kim dei ban lehraiñ, hynrei ki dei ban mih shakhmat ban ïalam sha ki Office sorkar ba kin ïoh jingïarap na ki Scheme sorkar ki bapher bapher.
La pynkup burom ïa ki arngut kiba don jingduna ha ka dkhot met da kaba ai ïa ki Momentus sha u Kalvin Suting, Moosakhia Village bad ïa u ma Nicholas Khonglah, Lai Lyngdoh.
Ha kane ka jingrakhe la don ka Medical Checkup (General) bad la pynlong ruh ka jingïalehkai na ka bynta kine kiba duna dkhot met kum ka Musical Chair, Spoon marbel race bad kiwei kiwei, ha kaba la sam ïa ki Price ïa kiba ïashim bynta. Katba ïa ka jingkren ai khublei la ïoh na ka kong N. Sutnga, UDA DSWO, Jowai.
