Mairang, Nohprah 01: Ka Seven United na Pyndengumïong, ka la ïoh rah ïa ka nam kum ka Champion Club jong ka Eastern West Khasi Hills District, haba ka la jop ïa ka final jong ka Phutbol Super Division ba la pynlong da ka Pyndengumïong District Sports Association mynta ka sngi da kaba pynliem ia ka Lumsohkhlur da 3 la 1 lyngba ka tie breaker.
Da kane ka jingjop, ka Seven United kan ïoh mihkhmat ïa ka Eastern West Khasi Hills District ha ka Meghalaya Super League ka ban long ha u bnai Kyllalyngkot u snem ban wan.
Ha ka jingïalehkai mynta ka sngi, ka Seven United kum ka Club kaba ïalehkai ha la ïing ka la kham bun ki paidbah nongkyrshan ka la ïalehkai bha naduh kaba sdang naduh ka rukom passing bad sted ruh ka rukom ïalehkai. Hynrei ka Lumsohkhlur ruh kaba don hi ki nongkyrshan jong ka, kam shym la aili bad ïakhun tyngeh ïa ka jingñiom ki nongïalehkai ka United sha ka kol jong ka. Ka jingtbit ki nongïalehkai defend ka Lumsohkhlur ka la pynduh lad ïa ka United ban ïoh thep kol.
Ka jingïakhun ha baroh kawei ka jingïalehkai ka long kaba mar ïabiang bor, ha kaba wat hadien ba la ai ka extra time ruh ym shym don ba ïoh thep kol.
Dei ha ka tie breaker ba u nongap kol ka United u la pyni ïa ka jingtbit ha kaba u la ïoh ban kem ne khynñiat shabar ïa ka jingshut da ki nongïalehkai ka Lumsohkhlur ban pynjop ïa ka team jong u da 3 kol la 1.
Ha kane ka jingïakhun final, u Bah Hamletson Dohling, President ka Meghalaya Football Association (MFA) u la long u Kongsan bad kular ruh ban ïoh da ka Ambulance na ka bynta ka PDSA na ka skhim u Myntri Rangbah. U Bah Sunesh Syiem, General Secretary ka MFA u la long Kongsan Symbud. Kine ki nongkitkam ka MFA ki la sam ruh ïa ki khusnam sha ki team kiba la poi sha ka final, ha kaba ka Seven United ka la ïoh ïa ka Trophy bad ka pisa 50 hajar tyngka, katba ka Lumsohkhlur pat ka ïoh ïa ka Trophy bad ka pisa 30 hajar tyngka. La pynshngaiñ ïa kane ka jingïakhun final da ka jingïadon lang ruh u Bah Cliff Nongrum, Vice President ka MFA, nangta ki nongkitkam barim ka PDSA, u Syiem Khynnah ka Hima Nongkhlaw bad kiwei kiwei.
