Shillong, Nohprah 01: Ki ar tylli ki jingïakhun hynne ka Sngi Thohdieng jong ka lympung 2nd DIVISION Football League 2023 ba la pynïaid da ka Shillong Sports Association ka la jam sha kaba kut ha kaba ka Pohkseh SC ryngkat bad ka Marbisu SC ki la khur jingjop ha ki jingïalehkai jong ki.
ïa ki jingïakhun la pynlong ha SSA Ground bad ka jingïalehkai kaba nyngkong ka la long hapdeng ka Pohkseh SC pyrshah ïa ka Laitkyrhong SC por 11:30 baje mynstep. Ha kane ka jingïakhun ka Pohkseh SC ka la khur ïa ka namjop lyngba ka shi kol ba la thep da u Freddy Jyrwa ha ka 7 minit.
Haba phai sha ka jingïakhun kaba ar kaba la sdang ha ka por 2:30 nohphaisngi, ka Sohryngkham SC ka la mad ïa ka namrem da 1-2 kol ha ka Marbisu SC.
Ka shi kol na ka Sohryngkham SC la thep da u Mebanpynshngain Warkhyllew shuwa ban kut ka por ha ka 90+5 minit, katba na ka Marbisu SC ki ar kol la thep baroh da u Seiborlang Nongbri ha ka 21 minit bud sa ka kol kaba ar ha ka 59 minit kaba la biang pura ban ïalam ïa ka kynhun ban khur namjop.
Ki jingïakhun mynta ka sngi jong ka SSA 2nd DIVISION Football League 2023 yn long biang ha SSA Ground, bad ka jingïalehkai kaba nyngkong kan sdang biang ha ka por 11:30 baje mynstep hapdeng ka Sohiong SC pyrshah ïa ka Mawtawar SC, nangta ka jingïakhun kaba ar pat kan long ha ka por 2:30 baje nohphaisngi hapdeng ka Laitlyngkot SC pyrshah ïa ka Nongkrem SC.
