Shillong, Nohprah 01: Ka kynhun ki rangïakura jong ka Services Sports Control Board ka la soh ban khur ïa ka nam Best Team ha ka sngi pynhap pyrda ïa ka 7th Elite Men’s National Boxing Championship, ha SAI Indoor Hall hynne ka sngi, hadien ba ki la jop haduh 10 tylli ki jingïakhun knieh takma.
Napdeng ki 13 ngut ki rangïakura ka Services haduh 12 ngut kiba la ïohrung shaduh ka final bad ki la jop haduh 10 tylli ki jingïaknieh takma kiba ki rangïakura kane ka kynhun ki la ïashimbynta.
Baroh ki jingïakhun final ha ki 13 tylli ki kyrdan (weight classes) la pyndep hynne ka sngi, bad la sakhi ïa ki khlur ïakura kum u Shiva Thapa jong ka Assam, bad u Amit Panghal na ka Services lem bad u Sanjeet na ka Services kiba la poi sha ka burom. Kine ki hynñiew sngi ba la pynlong ïa kane ka Championship ha Shillong, ka la plielad ïa ki paidbah nong Meghalaya ban sakhi hi da la ki jong ki khmat ïa ka rynsan ïakura kaba kham shongshit naduh ka South Asian Games kaba la long ha u snem 2016.
Kumban shu pynkynmaw la sdang ïa kane ka lympung naduh ka 25 tarik u Naiwieng bad la pynlong da ka Meghalaya Boxing Association (MBA) ha ka jingïatreilang bad ka Boxing Federation of India (BFI) kaba la ïoh jingkyrshan na ka tnat Sports and Youth Affairs, jong ka sorkar jylla Meghalaya.
Ki nongïalam ba pawkhmat jong ka jylla kiba la wanpoi ha kane ka sngi final ki kynthup ïa u Myntri khynnah jong ka tnat Sports and Youth Affairs- u Bah Shakliar Warjri, u MLA jong ka Mawlai -u Bah Brightstarwell Marbaniang, u Secretary General jong ka BFI -u Hemanta Kumar Kalita bad u Working President jong ka Meghalaya State Olympic Association – u Bah John F Kharshiing, lem bad kiwei kiwei.
Na ka liang jong ka Meghalaya, ki la don haduh 9 ngut ki rangïakura kiba la mihkhmat ïa ka jylla ha kane ka rynsan ïakura bad tang arngut kiba la jam sha ka pre-quarterfinals bad lah ban kdew ba kaei kaba ki mad na kane Championship kan dang ai mynsiem ban pynkwah ïa ki ban dang trei shitom shuh shuh ïalade ban poi sha ka thong.
Lah ban kdew hangne, ka thong ka long ban ai mynsiem bad kyntiew ïa ki samla ka jylla ka dei kawei na ki daw ba ka sorkar ka la ïaleh bad treishitom ban wanrah ïa kiba bun ki lympung ha nongbah Shillong kumba la sakhi ha kine ki snem ba ladep. Nalor kane, ka sorkar ka la pyrshang ruh da kaba pynbit pynbiang ha kaba ¤adei bad ki jingdonkam ha ka liang jong ka sport ban dang kyntiew shuh shuh ïa ki samla donsap ka Meghalaya ym tang ha ka boxing hynrei ha ki rynsan ïalehkai bapher bapher.
“Nga sngewkmen ban ïohi ïa ka jingïatreilang jong ka MBA, BFI lem bad ka sorkar ka la pynlong ïa kane ka Championship kaba seisoh,” la ong u Bah Shakliar Warjri haba ai jingkren ha kane ka sngi kut. “Naduh ba bynshet shuki Myntri ha nga, Nga la ïoh ban leit jurip kylleng ka jylla bad ïakynduh ïa kiba bun ki khynnah bad ruh ki samla kiba donsap ha ki jingïalehkai. Na ka liang jong ka sorkar ka ïohi ba kine ki samla ki don ïa ka sap kaba kyrpang bad ngi la ïatreilang ruh bad synjuk sports ban pynthikna ba ka Sport kan kiew shaphrang hapoh ka jylla. Kane ka dei ka thong bad ka jingkwah ka jong ngi.”
Shuh shuh, u tei u Myntri khynnah ka jylla u la pynkynmaw ruh ba ka sorkar ka la ïaid shakhmat ruh ka jingpyntreikam lyngba ki kam stad saïan (scientific approach) hapoh ka jylla, ha kaba ki la don haduh 14,500 ki nongïalehkai (athlete) kiba la pynhap hapoh ka standardised test, bad 200 ngut kiba la shah thup ha ka Elite Pathway Programme. Bad 12 ngut napdeng ki 200 kiba la shah jied mynta sha ka Super Elite Pathway Programme.
Haba phai sha katei ka lympung, man u wei pa u wei u rangïakura (boxer) kiba la jam shaduh ka final, ki la lah ban jop ha ki saw sien ki jingïakhun naduh kaba sdang bad bun ki jingïakhun hynne ka sngi ki la kut lyngba ka rai ki nongbishar (unanimous decision).
Ka sngi final ka la sdang da u Barun Singh ka Services u ba la pynliem ïa u Yaiphaba Soibam na Manipur da 5-0 ha ka 46-48kg, bud sa u Amit Panghal (Services) u ba la pynliem ïa u Anshul Punia jong ka Chandigarh ha ka flyweight 48-51kg.
U Lalit jong ka All India Police u la long ba nyngkong ban pynliem ïa u rangïakura ka Services, hadien ba jop da 4-3 ha ka kyrdan bantam 51-54kg pyrshah ïa u Pawan.
Ha ka featherweight 54-57kg final la sakhi ïa arngut ki Sachins kiba ïakhun na bynta ka takma ksiar, ha kaba u boxer jong ka Services u la pynliem ïa jong ka Railways. Bud sa ka namjop u Akash (Services) ha ka lightweight 57-60kg, pyrshah ïa u Varinder Singh (Railways.
U Shiva Thapa jong ka Assam u rangïakura ba ar ban pynliem ïa u ba jong ka Services’, ha ka thup kyrdan light welterweight 60-63.5kg class. Ma u lem bad u Vanshaj ki la ïoh markylliang khamtam ha ka wat ba 2 bad 3 hynrei ki nongbishar ki la ibit ban rai namjop sha u Thapa.
Hynrei na ka liang ki rangïakura ka Services ki la bteng biang ban jop ha baroh ki hynriew tylli ki jingïakhun final ba dang sah.
U Rajat u la jop ha ka welterweight 63.5-67kg, pyrshah ïa u Abhishek Yadav (Railways), katba u Akash u la jop pyrshah ïa u Abhinab Saikia jong ka Assam (u ba la ïoh ruh ïa ka nam Best Challenger Boxer) ha ka light middleweight 67-71kg. Ha ka middleweight 71-75kg la jop da u Deepak, katba u Lakshya u la jop ha ka light heavyweight 75-80kg.
Ha ka cruiserweight 80-86kg la jop da u Jugnoo. U Sanjeet, u la jop ha ka heavyweight 86-92kg.
Ka Services, ka la ïoh khur syndon ïa ka nam Best Team award, ha kaba u Akash u la khur ïa ka nam Best Boxer katba u coach ka kynhun, u Jai Patil u la khur ïa ka nam Best Coach. Ka Railways ka la wan kyrdan ba ar, bad ki la don ruh ki khusnam ïa ki rangïakura kum u Abhinab Saikia jong ka Assam (Best Challenger Boxer) bad u Pradeep Bisht (Best Official). Ka Meghalaya pat ka la khur ïa ka khusnam Fair Play Award.
