Shillong, Risaw 07 : Ka Raid Laban Sports, Social & Cultural Organisation (RLSSCO) ha ka sngi Saitjaiñ ka la sam haduh 42 tylli ki laptop sha ki samla pule kiba pass bha ha ka klas 10 bad ka klas 12 ïa kiba la phiah pat haduh 32 tylli ki thup.
Kitei ki kynthup naduh kito kiba wan shakhmat ha ka result jong ka klass 10 bad klas 12 bad kumjuh ruh ïa kito ki samla kiba leit skul mynstep bylla mynsngi ne bylla mynsngi leit skul janmiet kiba dei ki nongshong shnong jong ka Shillong South constituency.
“Ngi pynkup burom kyrpang ruh ïa kito ki samla kiba wat hapdeng bun ki jingeh, ka duk ka kyrduh bad ki bym ju tip ïa ka leit tuition hynrei ki ïakhun ia ka eksam bad pass bha,” ong u President ka RLSSCO, Bah Sanbor Shulla ba dei ruh u MLA ka thain.
Shuh shuh u la ïathuh ba na ka bynta jong u, um hun tang ban pynkup burom ïa kiba pass bha hynrei u kwah ban ai ka jingithuh ïa kito ki khun samla kiba nalor ba kim don shuh ïa u kpa ban kyrshan ïa ka jingpule jong ki, hynrei ki ieng ha la ki jong ki kjat ban bteng leit pule.
U ïathuh ruh ba don ki longiing kiba nalor ba ki leit skul hynrei ki ïarap ruh ïa ki kmie ha ka kam bylla la ka long bylla saitjain ne kino kino ki kam bylla.
“Na ka bynta jong ki, kam pher la ki pass ha kano kano ka Division hynrei ki donkam ka jingithuh namar ki trei shitom,” u la ong da kaba bynrap ba ka Organisation ka la buh kyrpang ruh ïa ka khusnam na bynt kito ki samla pule kiba wat hapdeng ka jingthut ha ki dkhot met hynrei ki tur beit shakhmat ha ki jingpule.
Ka RLSSCO ha kane ka sngi ka la pynkup burom haduh 293 ngut ki samla pule bad ka la sam haduh 42 tylli ki laptop ha ka jingïalang kaba long ha Soso Tham Auditorium. La donlang ruh ha katei ka jingïalang naduh u Myntri barim ka sorkar jylla, Manas Chaudhuri kum u kongsan kyrpang, nangta ki principal jong ki college bapher bapher bad ki kmie ki kpa.
Katei ka jingpynkup burom kadei ka sien kaba 20 ba ka kynhun ka la pynlong ïa ka jingithuh ïa ka jingtrei shitom ki samla pule na ka thain ha ki jingpule jong ki. Katkum ka jingïathuh jong u Bah Sanbor Shullai, ki la don haduh kumba 10,000 ngut ei ei ki samla pule kiba la shah pynkup burom ha ka kynhun ha kine ki 20snem.
