Tura, Risaw 05 : Ka jingleh donbor bad pynkheiñ aiñ jong ki briew ka aiñ ba phong Uniform kam dei satia ka kam ba dang thymmai bad ki Pulit ka West Garo Hills ki la don lang ha ka thup hadien ba uwei u Pulit la kynnoh ba ula set along ïa uwei u tynmen bad ïa u Khun nalor ka shoh ka tied ïa ki tang namar ka kam ïakajia jaka ha ka thaiñ Phulbari.
Namar ka jingsheptieng ïa la ka jingim na kane ka jingthombor, kine ki shikpa shikhun ki la ujor noh da ka ejahar sha u Superintendent of Police ka West Garo Hills ha ka 3 tarik Risaw.
Ha ka ejahar ba la phah sha u SP, kine ki shikpa shikhun ki la pyntip ba kane ka jingthombor u Pulit ïa ki ka la jia ha ka 23 tarik Nailur hadien ba ka kynhun ki Pulit kynthup u Secretary ka Village Defence Party (VDP) ki la wan sha ïing jong ki ha Nayagaon, Bhaitbari.
Ki Pulit ki la kurup noh ruh ïa ka power tiller jong u Kpa Md Soyod Zamal da kaba kam ba la ju pyndonkam ïa kane ka kor ban leit rep ha ka jaka kaba don hapdeng ka jingïakajia.
ïa kane ka power tiller la rah noh da ka kynhun ki Pulit haba bthah ïa ki bahaïing hasem ba kin leit mih sha Phulbari Police Station ha ka por janmiet.
Dei haba u Kpa Zamal bad arngut ki Khun ki la poi ha Police Station, ki la iakynduh ïa u Officer in Charge Yadav uba la kren tohmet da ki ktien khlem akor bad buh jingkylli ruh ba ki ïoh bor naei ban rep ha katei ka jaka.
“U Kpa jong nga ula pyni ïa ki kot ki sla jong ka jaka kaba dei ha ka kyrteng jong u bad ong ruh ba kam don satia ha ka jingïakajia. Wat ka pata jong ka jaka ba don 1 bigha bad 1 lesha ka don ha ka kyrteng u Kpa, une u Heh Pulit um shym la pynsngap satia bad kren sih kren sang pynban” ïathuh u Md Intadul Islam.
Kat kum ka jingujor, la pyntip ba ïa baroh laingut ki shikpa shikhun la ïalam medical check up sha hospital da ka kynhun ki Pulit hynrei dei haba wan phai, kila ngat ha ka jingshah shoh shah bom ha une u OC bad ki briew jong u bad ki la khynniat ruh sha along jong ka Police Staion bad pynshong haduh shikynta tam.
“U Kpa jong nga u dei uba pang klongsnam bad u dang shu wan sumar na Goalpara District ka Assam” ong une u Khun.
Ia kine ki shikpa shikhun la pyllait noh hadien ba ki Pulit ki la dep shim statement na ki.
