Nongpoh, Nailur 30: Ka Christian Endeavors Society jong ka Balang Presbyterian Mawlyngkhung haka sngi Saitjaiñ ka la pynkut noh ïaka lympung ïalehkai phutbol da ka jingïalehkai phainal hapdeng ka Umkei SC pyrshah ïaka Mawrong SC ba la pynlong ha madan ïalehkai jong ka shnong Mawlyngkhung bad ha kane ka jingïaleh kai ka Umkei SC ka la long ka lahduh hadien ba ka la pynliem noh ïaka Mawrong SC da 5-0 kol.
Ka CE Society jong ka Balang Presbyterian Mawlyngkhung ka la pynlong ïa kane ka lympung kum shibynta ka jingrakhe ïaka taïew jong ki samla ka Youth Week/Youth Sunday. Ha kane ka lympung ki la don haduh 32 tylli ki kynhun kiba la wan ban ïashim bynta bad ka Umkei SC kum ka lah duh ka la ïoh ban rah ïaka song pisa kaba T.30 hajar bad ka Mawrong SC kaba wan ba ar ka la ïoh rah ïaka song pisa kaba T.20 hajar
Ha kane ka sngi la wan ban pynkut noh ïa katei ka lympung da u Samla Ajit Makri President HANM Ri-Bhoi District kum u kongsan haka jingïadon ryngkat lang u bah Shynsharlang Nongkseh President (CE Society), kong Albamaysaline Nongbet Secretary CE Society, Bah Dianghun Par Rangbah Shnong Mawlyngkhung lem bad ki dkhot jong ka HANM Mawlyngkhung .
