Nongpoh, Nailur 26: Kiba bun ki nongri sniang ha Ri Bhoi ki la poi sha u pud ka jingduh jingkyrmen ban ri ïa ki sniang bad ka daw ka long ba bunsien haba ki ri sniang ki hap ban mad ïa ka jingduhnong na ka daw ka jingïap jong ki sniang hadien ba ki la ri la sumar.
Kane ka jingïap kynsan ki sniang ba la suba ba ka lah ban dei ka kynja khlam ka la ktah shibun eh ïa ki nongrep ne ki nongri sniang ha Ri Bhoi bad kumba la ioh lum jingtip ki sniang ki ju ïap noh hadien ba la dep ban ri ne sumar bad sa tang ba kin ioh jingmyntoi ki duhnong noh na ka jingïap kynsan ki sniang ha ka por ba kim poi pyrkhat.
Dang shen ruh haduh 10 tyhlli ki sniang ki la shu ïap kynsan ha kawei na ka Cooperative Society ba la tip kum ka Nongku Chaphrang Multipurpose Cooperative Society kaba don ha Saiden, Ri Bhoi District.
Kane ka Cooperative Society ka ri ïa ki sniang da ka jingthmu ban ioh jingmyntoi, hynrei baroh ka jingtrei shitom jongki ka la shu sep ei noh, namar dang shen haduh 10 tylli ki sniang ba ki ri ki la shu ïap bad mynta ka sngi ruh lai tylli ki la ïap biang kynthup ïa ka sniang kmie bad ar tylli ki sniang khun.
Kumba la ioh lum jingtip, la ong ba dang shen ha katei ka jingïap kitei ki 10 tylli ki sniang ki la de ban pyntip sha ka tnad Veterinary Department ban wan tohkit bad ki riew shemphang ba dei peit ïa ki mrad ki la dep ruh ban leh ïa ka postmortem bad kumba long haduh mynta kim pat tip satia ïa ka daw jong ka jingïap kine ki sniang namar ba ki dang ïai ap ïa ka kaiphod ban sa pyntip da ka tnad Veterinary.
Ha kaba ïa dei bad kane ka jingsuba ba ïap khlam ki sniang, ym tang kane ka Cooperative Society kaba la pynpaw ka jingduhnong kaba khraw halor kane ka kam ri sniang, hynrei kumba la ioh lum jingtip ruh ha jan kylleng ka them Ri Bhoi ka don ka jingïap ki sniang bad kum ki nongri sniang ki la pynpaw ïa ka jingduh jingkyrmen ban dang ri sniang, namar kane ka jingïap ki sniang kam ai jingmyntoi shuh ïa ki kum kita ki nongri sniang ha kaba bunsien sa tang ba kin ioh jingmyntoi ki sniang ki ïap kynsan noh bad kaba long ruh ka jingduhnong kaba khraw ïa ki ban dang trei ïa kane ka kam.
