Nongpoh, Nailar 12: U Myntri ka tnat Textile jong ka Sorkar Meghalaya, u Bah Metbah Lyngdoh, mynta ka sngi u la plie paidbah ïa ka Mawlong Nongtluh Weaving Centre ha shnong Mawlong Nongtluh, Ri-Bhoi District. Kane ka jingïalang ka long kum shi bynta na ka sienjam jong ka Sorkar Jylla ban kyntiew, ban pynkupbor bad ban kyrshan ïa ki nongthaiñ jaiñ tynrai ha ka jylla.
Ha kane ka jingïalang la donlang ruh u MLA ka Nongpoh, Bah Mayralborn Syiem, ka E. Marak, Assistant Commissioner, Ri-Bhoi, u Bah Wanlam Kupar Kharmudai, Deputy Project Manager, Meghalaya Basin Management Agency (MBMA), ka Kong D. Tariang, District Handloom Officer, Ri-Bhoi, lem bad kiwei.
Ka Mawlong Nongtluh Weaving Centre ka dei ka projek kaba la pyntreikam lyngba ka MBMA, ha ka jinglut kaba kot sha ka T.1.17 klur. La seng ïa kane ka centre da ka jingthmu ban plie lad ïa ki nongthaiñ jaiñ, ban pynïar ïa ki lad jingïarap bad kamai, bad ban kyntiew ruh ïa ka kam thaiñ jaiñ tynrai ha Mawlong Nongtluh bad ki shnong kiba marjan.
Haba kren ha ka jingïalang, u Bah Mayralborn Syiem u la pynpaw ïa ka jingsngewkmen halor ka jingplie ïa kane ka Weaving Centre. U la ong ba kane ka projek kan long ka jingïarap kaba kongsan bha ïa ki paidbah, khamtam kiba don sap haka kam thaiñ jaiñ, bad u la kyntu ruh ïa ki paidbah ban pyndonkam bha ïa kane ka lad jingïarap.
Na ka liang jong u Myntri ka tnat Textile, u Bah Metbah Lyngdoh, u la ong ba ka jingïoh ïa kane ka Weaving Centre ka long ban pynkupbor ïa ki nongthaiñ jaiñ bad ban kyntiew ïa kane ka kam ha katei ka thaiñ.
U la ban jur ruh ba ka kam thaiñ jaiñ kam dei tang ka lad ban kamai hynrei ka long ruh ka bynta kaba kongsan ban pynpaw ïaka jingriewspah ha kaba ïadei bad ka kolshor tynrai, namar kata ka don ka don ka jingangnud ban kyntiew bad pynneh pynsah ïaki kam thaiñ.
U Bah Metbah u la kyrmen ba kane ka centre kan ym long tang kum ka jaka ai jinghikai, hynrei kan long ruh kum ka jingïasnohkti hapdeng ki nongthaiñ jaiñ bad ki jingïarap bapher bapher jong ka sorkar, khnang ba kin lah ban kyntiew ïa ka kam, bad ban pynkhlaiñ ïa ka ïoh ka kot jong ki paidbah ha katei ka thaiñ.
