Nongpoh, Nailur 26: Ka lympung ïalehkai Ri-Bhoi General League bala pynlong da ka Ri Bhoi District Sports Association (RBDSA) kala sdang mynta ka sngi ha madan Umsning Patarim, bad ha katei ka lympung kumba 64 tylli ki sports club bala pynïasoh bad ka RBDSA kila wan ban shim bynta ha katei ka lympung.
Ha katei ka lympung ïalehkai u Bah Ransom Sutnga President ka Mawkhar Sports Club u la wan ban shim bynta kum u kongsan, u Bah Rocky Kylla Chairman ka Umsning Town Durbar kum u symbud kongsan haka jingdonlang u Bah RB Shadap President RBDSA, Bah Dipshon Ryntathiang General Secretary, Bah RR Makdoh Adviser, Bah PS Nongrum Chairman Football Committee, Bah Rocky Marwein Rangbah Shnong Umsning Proper B bad kiwei kiwei ki riew rangbah.
Ka jingïalehkai ba nyngkong ha katei ka sngi kala long hapdeng ka Umkei SC pyrshah ïaka Mawkhan SC ha kaba ka jingïalehkai kala long kaba itynnad bad ïakhaid bha bad haduh ba kut ka kylla miet ka jingïakhun kala kut noh hapdeng ka jingïakhaid da 2-2 kol.
Haba kren ha katei ka sngi naka liang u Bah Ransom Sutnga kum uwei naki nongïalam ba ïeid ruh ïaka kam ïalehkai u la ai ka jingkhublei ba kyrpang ïaka RBDSA kaba la shim biang ïaka sienjam ban pynlong kum katei ka jait lympung naka bynta ban sei ïaki rangïalehkai kiba kynsai bad kumjuh ruh ki kynhun kiba tbit naka bynta ban kyntiew ïaka kam ïalehkai haka district.
