Shillong, Nailur 24 : Ki la don palat 443 ngut ki samla pule doktor bad ki doktor kiba la kyrshan da ka sorkar lane kiba leit pule doktor na ka bhah sorkar hynrei kim shym wan trei pat ha ki jaka ai jingsumar jong ka sorkar jylla.
Ïa kane la ïathuh da ka Myntri ka tnad ka Koit ka Khiah ka jylla, Kong Ampareen Lyngdoh haba wanrah ïa ka jubab ha ka Dorbar Synrai kaba dang shu lah shen.
Katkum katei ka jubab ba la wanrah, ka Myntri ka la kdew ruh ba ki daw ba kitei ki samla pule doktor bad doktor kim pat lah ban wan trei kadei namar don kiba leit bteng ïa ki post graduate jong ki hadien mar ïa dep ïa ka MBBS bad don pat ki samla pule kiba hadien ba ki la dep ïa ka internship ki hap ban pyndep sa ïa ka jingïateh (bond) ha kito ki jaka ne ki jylla ba ki pule bad don pat kiba dang bteng sa ïa ka Senior Resident Doctor (SRD).
Ka Myntri ka pyntip ruh ba ki samla pule doktor kiba dei na ka unreserved lane ka general category ba la kyrshan da ka sorkar ban leit pule haduh mynta ki la don baroh 237 ngut, kata naduh 1995 – 96 haduh 2023-24.
Ka la ïathuh ruh ba na kine, tang 12 ngut (na ka kynhun 1995-96 haduh 2017-18) kiba la wan trei ha ki jaka sumar jong ka sorkar katba 147 ngut pat ki kyntait ban wan.
Haba ïadei bad ka sienjam ba la shim da ka sorkar ban pyntikna ba ki samla pule doktor ba pule na bhah jong ka sorkar ba ki dei ban shakri ha ka jylla, ka Myntri ak la ong ba ka sorkar ka la pyntreikam ïa ka soskular ba ki la ïateh bad kumta mynta ki phah ïa ka jingthoh sha baroh ki samla pule doktor kiba khlem wan mih lane wan trei kata naduh ki snem 1995-96 haduh ki snem 2012-2013.
Ha kajuh ka por, ka Myntri ka la pyntip ruh ba ki don kumba 400 ngut ki doktor ba la thung da ka Meghalaya Medical Services Recruitment Board (MMSRB) ha ka kylla kaba nyngkong.
“Ha ka kylla kaba ar pat kin don haduh kumba 50 ngut ki specialist bad 70 ngut ki medical officer kiban sa shah thung,” ka la ong.
Katkum ka jingïathuh jong ka, ka jingdon ki samla pule doktor kiba la bei tyngka da ka sorkar ha ki jaka pule bapher bapher kiba don ha ka ri ki la poi haduh 1650 ngut, naduh u snem 1995-96 haduh ki snem 2023-24.
Hynrei la pyntip pat ba na kine baroh, tang 948 ngut kiba wan ban trei ha ka jylla.
