Jowai, Nailur, 24: Ka samla Dorothy Roy Tariang ka la ïoh ïaka kyrdan Gold Medal da kaba wan hakhmat ha ka Master of Business Admistration (MBA) jong ka Assam Don Bosco University bad ka la ïoh haduh 9.29 na ka 10.0 ha ka Cumulative Grade Point Average (CGPA).
Ka samla Dorothy Roy Tariang ka dei ka khun jong ka Dr (Mrs) Iwbih Nylla Tariang, Senior Veterinary Officer bad u kpa u dei u Dr. Anirban Roy, u nongthoh khubor, kiba shong basah ha Mynthong Jowai. Ka Dorothy Roy Tariang ka la pyndep ïa kane la jingpule bniah (Specialization) ha ka Human Resource Management.
Kane ka dei ka sien banyngkong ïa kane ka samla napoh ka jylla ban poi sha kane ka kyrdan bahakhlieh ha ka MBA programme jong ka Assam Don Bosco University.
Ïa ka Dorothy Roy Tariang la ai ïa kane ka khusnam Gold Medal ha ka ‘12th Convocation’ jong ka Assam Don Bosco University kaba la pynlong ha ka Sngi Saitjaiñ ha Tapesia Campus ha Guwahati.
Halor kane ka jingjop la Dorothy ka don ka jingthrang ban trei shitom na ka bynta ban pynkiew ïa ka jylla ha ka roi ka par. Hashwa ban kan pule ïa kane ka MBA programme jong ka Assam Don Bosco University ka la pyndep ïa ka Graduation ha ka Subject English Literature na Amity University.
Ha kane ka sngi pynkup burom la don lang u Lat ka Jylla Assam u Gulab Chand Kataria, u Chancellor jong ka Assam Don Bosco University u Fr. Januarius Sangma, u Vice Chancellor u Fr. (Dr) Jose Palely, nalor kiwei de.
Ïa kane ka nam Gold Medals la pynkup burom sha ki 36 ngut kiba la pyndep ïa ka jingpule ryngkat ka jingïoh (Highest) ha ka Cumulative Grade Point Average (CGPA) ha manla ki programme ha ki kyrdan pule bapher bapher.
