Ngim pdiang ïa ka surok Rel kat bym pat pyntreikam ïa ka ILP, ong ka KSU

Nongpoh, Jymmang 07: U President ba rangbah ka Khasi Students Union, (KSU), u Samla Lambok Star Marngar mynta ka sngi u la kren shai ba ka KSU da lei lei kam pat lah ban pdaing ïa ka jingtmu ka sorkar kmie bad sorkar jylla ban wan rah ïa ka surok rel hapoh ka jylla Meghalaya.
U Samla Lambok Star Marngar u la kren ïa kitei ki kyntein ka dei ha ka jingïalang jong ka seng kaba la long mynta ka sngi ha Ing Dorbar Hall, Sajer Nongpoh, ba ka seng ka la pynskhem ïa ki nongïalam jong ki 8 tyllli ki Unit ba hap hapoh ka Nongpoh Circle.
Kitei ki Unit kiba u President ba rangbah ka KSU u la ai ïa ka jingpynbam smai ïa ki nongïalam ki kynthup ïa ka Umajri Unit, Mawphrew Unit, Mawdiangum Unit, Mawroh Unit, Langpadon Unit, Nartap Unit, Saiden Unit bad Umsawnongkharai Unit ba kum ka seng ka la pynmih ïa ki nongïalam ban kit ban bah ïa ki kam jong ka seng na ka bynta ban shakri bad ban iada ïa ka jaid bynriew kaba dei ka nongrim kaba hakhmat eh jong ka seng KSU.
Na ka liang u President ba rangbah ka KSU, u Samla Lambok Star Marngar haba kren ruh ha kane ka sngi ban ai mynsiem ïa kine ki nongïalam bad ki dkhot ka seng na kitei ki Unit bapher bapher, u la ong ba ka seng haduh kine ki sngi ka dang ieng triang ban iada ïa ka jaid bynriew bad u la kren shai ruh ba ka seng da lei lei kan nym pat pdiang ïa ka surok rel ba ka sorkar kmie lyngba ka Parliamentary Standing Committee ka tnad Railway la ka la thmu ban wan rah ïa ka surok sha ka jylla Meghalaya.
U la ong ruh ba la suit la shor ruh ïa ka KSU naduh u snem 1978 hapoh ka jylla ka dei hi na ka daw bah jong ka jaid bynriew ha kaba kum ka seng kam shym la phai khmat tang ban kyntiew ïa ka pule ka puthi ki khun samla ka jylal, hynrei ban iada kyrpang ïa ka hok jong ka jaid bynriew rilum Khasi-Jaintia.
Namar kata, nalor kiwei kiwei kiwei ki jingsneng bad ki jingkyntu ïa kine ki nongïalam ba kin shim ïa kata ka mynsiem jong ka jingkitkhlieh ban iada ïa la ri bad ka jaid bynriew, u Samla Lambok star Marngar ula kren shai ruh ba ka KSU kan nym pdiang ïa ka Railway katba ka sorkar kam pat lah ban pyntreikam ïa ka Inner Line Permit bad lada ki leh da ka bor ruh wat la dei ban ialeh da ka thma ruh ka seng KSU ryngkat ka jaid bynriew kin nym pyndem ïa ka sorkar jylla lane ka sorkar kmie.
La sakhi lang ruh ha kane ka sngi ba la pynskhem ïa ki nongïalam kitei ki 8 tylli ki Unit da kajingdon ryngkat u U Samla Eric Nongkynrih Asst. General Secretary KSU CEC, Samla Ferdynald K. Kharkamni President KSU NKHD, Samla Lambok Joseph Rymbai Vice-president KSU NKHD, Samla Lester Nongbet, Organising Secretary KSU NKHD, Samla John Lyngdoh, President KSU Nongpoh Circle, Samla Baïashanlang Kharshanlor, General Secretary KSU Nongpoh Circle bad kiwei pat ki Nongïalam ka KSU NKHD Unit.