Dawa ka shnong Thangskai ïa u DC ban pyndam ïa ka kyrteng u bar jylla na ka thup PRC

Jowai, Nailur, 06: Ki nongïalam jong ka shnong Thangskai naduh u Waheh Shnong, ki dkhot Committee Shnong ha ryngkat ka jingsynranlang jong ka Jaiñtia Student’s Union (JSU) Khliehriat Circle ha ka sngi Balang ki la ai da ka jingthoh sha u Deputy Commisioner jong ka East Jaiñtia Hills District ban dawa ba dei ban pynduh pyndam ïa ka Permanent Residential Certificate (PRC) jong u Ayush Kumar bad u kpa jong u Sunil Kumar.
La ïathuh ba kine ki bar jylla ki la pyndon kam thok ban aplai ïa ka seat jong ka State Quota ban pule MBBS bad na ka liang ka shnong ka la pynshai ba ha u snem 2021 la ai syrnot nongshong shnong kaba shipor kaba long tang hynriew bnai namar u kpa jong une u khynnah u dei uba trei ha Dalmia Cement uba la pan ïa ka Temporary Residential Certificate na ka shnong ban phah sha ka skul ha Orissa.
Hynrei pynban kine ki bar jylla ki la pyndonkam thok ban aplai ïa ka PRC na ka ophis u Deputy Commisisoner jong ka East Jaiñtia bad ki la leh thok bad shukor ban ïohlad syndon ban ïoh bhah pule MBBS.
Ka Dorbar Shnong Thangskai ka la ai da ka jingthoh sha u DC ban dawa pynduh syndon wat ïa ka Seat Quota MBBS namarba une u khynnah bad u kpa jong u ki la leh thok bad shukor ban myntoi ïalade.
Ka JSU ka la maham ïa kiwei ruh ki bar jylla bad ïa ki nongïalam shnong ba kim dei ban shim kabu lane ban ai No Objection Certificate (NoC) lane kino kino ki syrnot sha ki bar jylla.
Ka seng ka la dawa ruh ïa ka Myntri ka tnat ka Koit ka Khiah ka Sorkar Jylla ban weng ïa u Ayush Kumar na ka bhah jong ka thup pule doktor MBBS bad dei ban ai bujli sha ki samla pule trai ri trai muluk.