Shillong, Nailur 04 : U Symbud Myntri Rangbah ka jylla, Bah Prestone Tynsong ba dei peit ruh ïa ka tnad Kampohiing haka sngi Nyngkong u la kyntu ïa ki kynhun kiba ju pynlong ïa ki jingïakhih ba ki dei ban leh da ka burom bad kaba jai jai namar ki pulit kim lah ban shu long tang ki nongpeitkai haba don ba pynkhein ïa ka suk ka saiñ.
“Nga kyrpad ïa baroh ki nongshong shnong ka jylla la ka long ïa ki sengbhalang ba kim dei ban leh palat pud. Ka ain ka don bad ngin sa pyntreikam ïa ka ha kano ka rukom kaba dei ban leh,” ong u Bah Prestone haba kren bad ki lad pathai khubor.
Katei ka jingkren jong u kadei hadien ba ka la mih ka jingkulmar kaba jur hapdeng ki dkhot ka HITO bad ki pulit hadien ba katei ka kynhun sengbhalang ka la pyrshang ban tur na Sadar Police Station sha Secretariat hadien ba u President jong ki Bah Donbok Dkhar u la shah khot hajir ha u Investigating Officer haba ïadei bad ka mukotduma ba phong ïa ka uniform rong iong.
Katkum ka jingïathuh da ki pulit, katei ka jingjia ka la poi haduh u pud ka jingshah thombor jong u magistrate bad lai ngut ki pulit katba u Deputy Superintendent of Police u la mynsaw ha ki bynta jong ka khlieh na ka daw ka jingshah kawang maw ha kitei ki kynhun ba ïakhih. Na ka liang ki pulit ruh ki la kem noh ïa ki 10 ngut ki dkhot ka HITO.
“Nga kyntu ïa baroh ba lada phi don ka jingïakhih pyrshah dei ban leh da kaba jai jai ym ban pynkhih win namar ka don ka aiñ. Lada ki pulit ki pyni bor ki ong ba ki pulit ki leh ïa kaba bakla hynrei hato ka don hok ïa ki pulit ba kin shu long tang ki nongpeitkai lada don ba pynkhein aiñ,” bynrap biang u Symbud Myntri Rangbah.
Haba jubab halor ka jingkylli, u Bah Prestone u la ong ruh ba ym ju dei ban ong ba ki paidbah ki shah bom shah thied ha ki pulit hynrei dei ruh ban peit ba ki pulit ruh ki shah thombor ha ki paidbah.
