Khynra Trading License bad khang khyrdep ka HITO ïa ki dukan bar jylla ha ka thaiñ Bhoirymbong

Nongpoh, Nailur 04: Ka Hynñiewtrep Integrated Territorial Organization (HITO) Bhoirymbong Area ha ka jingïa synran lang ki nongïalam na Ri Bhoi District hapoh ka jingïalam u samla Alvis Kyrsian Vice-president Ri Bhoi District bad u Samla Samuel Hinge Persident Bhoirymbong area lem bad ki dkhot na Bhoirymbong Area mynta ka sngi kila leit ban khynra ïaki dukan bar jylla nad kumjuh ruh ban talasi ïaki Trading Licence bad kiwei kiwei ki kot ki sla kat kum ki jingdonkam ïa ki dukan bar jylla kiba shong beaiñ hapoh ka Ïew Bhoirymbong bad ki dukan kiba don haka surok Shillong Bye-pass.
Ha kane ka jingleit khynra ki dkhot ka HITO ki la lap ba na kine ki bar jylla bun kidei ki bym don ïaki khot ki sla kiba biang bad don ruh napdeng jong ki kiba la ioh jingtip kila khang lypa ïaki dukan shuwa ban wan ka HITO bad naka liang ka seng ka la khang kyrdep ruh shi syndon ïaki dukan jong kito ki dukan ki bym lah ban pynbiang ïaki kot ki sla bad kala maham ruh ba lada lim lah ban pynbiang ïa ki kot ki sla kim dei shuh ban wan shong die ne buh dukan hapoh kane ka thaiñ ban wan kamai beaiñ.
Haba kren sha ki lad pathai khubor naka liang ki nongïalam jong ka HITO kiba kynthup ïa u samla Alvis Kyrsian Vice President ka HITO Ri-Bhoi u la ïathuh ba ha shwa ban pynlong ïa kane ka jingkhynra naka liang ka seng ka la dep ban phah ïaka shithi sha u Executive Member ba dei peit ïaka tnad Enforcement ban kyrpad ba kin pynlong ïaka jingkhynra ïa ki kot ki sla jong ki bar jylla ha katei ka thaiñ namar ba la jyllei palat ki bar jylla kiba wan ban shong dukan haki thaiñ Bhoirymbong, hynrei kaba lyngngoh ka long ba naka liang ka KHADC bad ka tnad enforcement kam shym la pynsngap ïa kane ka jingkyrpad jong ka seng bad dei halor katei ka nongrim ba ka seng kala shim ïaka sienjam ban khynra hi namar ka jingsngap mynthi jong ka KHADC.
U Samla Samuel Hinge, President ka HITO Bhoirymbong area u la ïathuh ba ka daw ka pynlong ïaki ban khynra ïaki kot ki sla ka dei namar ba la jyllei bun ki bar jylla kiba tuid sha kane ka jaka ban khaïi ïaki mar ki mata lane ban seng ïaki dukan bad kane ka lah ruh ban wan rah shibun ki jingma lada ngim long kiba husiar naduh mynta.
U la la ong ruh ba ka seng kan nym shong kli kti ban kan dang ïai budien ïa kine ki kam khnang ba ngin lah ban tehlakam ïa kane ka jingwan tuid jong ki bar jylla sha katei ka thaiñ.