Nongstoiñ, Nailur, 3: Ha ka sngi saitjaiñ ba la dep ki nongshong shnong jong ka Langpih ki la ïa mih uwei u rangbah naman kawei pa kawei ka thliew ïing ban pynkhuid ïa ki lynti shnong bad ki rud ki kiar jong ka surok da kaba sdang na jan ka Government L.P Skul haduh steshon ïew.
Ha katei ka sngi la pynlong ruh ïa ka jingthung dieng harud jong ka surok baroh shi lynter ha kaba ïa ki tynrai dieng la ai sngewbha da u bah T.Marweiñ. Ka jingai sngewbha ïa kitei ki tynrai dieng, ka long kum ka dak jong ka jingpynsah jingkynmaw ïa ka jingïatrei lang bad ka dorbar shnong Langpih la arphew snem tam.
Nalor kata ka jingai sngewbha ïa kitei ki tynrai dieng, ka long ym tang ban pynitynnad hynrei ban pynsngewthuh ïa baroh ki rangbah shnong, ba ka jingthung ïa ki dieng ka dei ka lad ban ïada na ka jingkhluit ka mariang lane ka global warming kaba la ktah bha ïa ka pyrthei baroh kawei. Nalor kata ki dieng ki siej bad ki khlaw ki dei ki bynta kiba kongsan tam kiba pynneh ïa ki umpohliew bad ki wah duid ha sla khyndew.
Haba ïakren bad u bah H.Sangleiñ uwei na ki nongïalam shnong, u la ong ba ka dorbar shnong Langpih ka ju pynlong ïa ka jingpynkhuid ïa ki lynti shnong shisien man la u snem. Shuwa ban pynlong ïa ka jingpynkhuid lynti shnong, ka dorbar ka ju phah pyrta ha u sangot ba man la ka thliew ïing ki dei ban mih uwei u rangbah.
