Ba sniew palat ka surok ban leit sha Nolikata Border Haat, duh nong ki nongkhaïi Khasi
Mawkyrwat, ‘Nailur, 03: Ka long kaei kaei ka jingduh jingkyrmen kaba khraw na ka bynta ki paidbah nongkhaïi kaba dei ha ki thaiñ khappud namar da ka jingsniew palat ki lynti ki synkien ka pynlong ïa ki nongrep ba ki don hapdeng shibun ki jingduh jingkyrmen namar ka jingbym lah jong ka Sorkar Jylla bad kumjuh ruh ka ophis jong u Syiem Hima Mawiang ban shna ïa ka surok ban leit sha Nolikata Border Haat – ka Ïew ïa khaïi hapdeng ka India bad Bangladesh, kaba don ha Nolikata, hajan Ranikor, South West Khasi Hills District.
Ym tang kata, ka la wanrah ruh ïa ka jingduh-nong kaba khraw ïa ki nongrep Khasi kiba kit ïa ki mar rep bad kiwei kiwei ki mar ban leit die sha katei ka ïew ha kaba ki kali ki la hap ban kit tang khyndiat eh ki mar namar ba jingsniew jong ka surok ka la long shaba palat kat haduh ba dei tang ki kali pick-up 4×4 kiba lah ban ïaid na katei ka surok.
Hadien kine ki jingeh ba ka paidbah ki la ïa kynduh kim kwah ban shu sngap hynrei ki paidbah nongkhaii na katei ka thaiñ ki la mihshakhamt ban pyntip sha ka KSU Ranikor Circle, bad mar kumta hi ka seng khlem da pynslem ki la hiar ban leit jurip ïa katei ïew, kaba la long kawei na ki ïew ba ai jingkyrkhu ïa ki nongkhaïi ka thain khappud ban shalan ïa ki mar ki mata sha Bangladesh bad kumjuh ruh ban thied ïa ki mar Bangla bad die pat sha ki ïew bapher bapher hapoh South West Khasi Hills District bad kiwei de ki distrik ha kaba ïa kane ka kynhun la lamkhmat da u bah Marconi Thongni, President ka Khasi Students Union (KSU) jong ka Ranikor Circle ryngkat bad kiwei pat ki nongïalam jong ka seng.
Namarkata, na ka liang u bah Marconi Thongni ha kane ka jingjurip haba kren ha ki lad pathai khubor u la kyntu jur ïa ka Sorkar bad kumjuh ruh ka ophis jong u Syiem Hima Mawïang, uba long trai ïa kane ka ïew, ba ki dei ban shimkhia ban marmot mardor khlem pynslem bad ban theh maw bad theh shyiap ha kane ka surok tang ban pynsuk ïa ka leit ka wan ki paidbah lyngba kane ka surok kaba jngai kumba 1kilometer ei ei.
Ha kawei pat ka liang, u bah Marconi u la ong ba ka KSU ka kyntu jur ïa ka Sorkar Jylla ba ka dei ban shimkhia halor kane ka bynta bad la kumno kumno ha kine ki bnai tlang ka dei ban shna noh syndon da ka surok kaba bha ïa kane ka lynti ban leit sha kane ka Border Haat khnang ba kan ym don ka jingthut ha ka leit ka wan ïa ki nongkhaïi bad kumjuh ki paitbah.