Khliehriat, Nailur, 01: Ki ar ngut ki samla rangbah na East Jaiñtia Hills District, u bah Arkijuh Dkhar bad u bah Becare Me O Nongtdu, ki la pynpaw ka jingsngew khia halor ka jing kiew palat ka bai bor ding electrict ha East Jaiñtia Hills District, halor kane ka mat ki la buh ka jingkylli, hato ïano yn kynnoh, namar ka la i kumba la ban jur ka jingban khia ïa ki paidbah kiba pyndonkam bor ding.
“Haba ngi pyrkhat shaphang ka jingdonkam ka bor ding electrict, ngi pyndonkam ha kiba bun ki liang bad ki jait kam, kaba ai jingshai ruh haba dum, ka pynneh ruh ïa ka mariang, namar ha ki por mynshwa lada donkam jingshai hap ban thang da ki dieng bad phnmeh da ka ding, hynrei mynta ym donkam shuh ïa kaba kum kane namar ngi la ioh ïa ka bor ding, hynrei haba ka jing ban khia ka kham jur ban ïa kaba ngi iohnong, kan jia aiu, mynta haba kren shaphang ka dor bai bor ding kaba kiew na ka T300 tyngka sha ka T400 tyngka, na ka T900 tyngka sha ka T 4000 tyngka bad kumta ter ter bad haba iohsngew ïa ka jingud jong ki paidbah kiba kynduh jingeh halor ka jingkiew bai bor ding, hato kane ka sorkar MDA II, u myntri ba dei peit ïa ka bor ding kaba dei ka tnat MeECL bad kumjuh ruh ki bor district, kumno kin leh halor kane? Hato ki kmen mo ban iohi ba ki paidbah ki kynduh jingeh lane long ka jingban khia halor ka jingpyndonkam bor ding”?
“Kum ki nong shong shnong kiba don ka jingkitkhlieh, ngi la ju iohsngew ba ki paidbah ki la ju kyrpad ban pynduna ïa ka bai bor ding bad kiba bun ruh ki jingjor ki la mih na ka daw ka jingkiew palat ka bai bor ding, hynrei ym shym don ba sngap ïa kane, ngim lah shuh ban sngewthuh ïa ka rukom treikam ka tei ka tnat khamtam ha kaba shna ïa ka bai bor ding bad ïa kaba kum kane lah ban batai tang lyngba ka mathematical formula kaba ki pyntrei ha ka tnat kaba ka jingkheiñ mathematics, algebra, trigonometry, geometry bad ka graph calculating kim lah shuh ban ai jubab, katno tam lei kito kiba dang duna ka jingnang jingstad kin lah sngewthuh ïa kane ka rukom kheiñ jingkheiñ, kumta ki la shuh sah ha ka umdum bad mad jingeh ha ka jingban khia ka bai bor ding”
Na ka liang u bah Arkijuh Dkhar bad u bah Becare Me O Nongtdu, ki buh ka jingkylli bad ha kaba iadei bad kane ka jingkiew ka bai bor ding, hato mano ban ai jingpynshai lane ban pynsngewthuh ïa ki paidbah, hato ki paidbah shano kin leit ban ioh jingpynsngewthuh? Hato ki nongmihkhmat, ki sengbhalang, ki NGOs ki lah mo ban leh eiei halor kane ban weng ïa kane ka jingeh jong ki paidbah?.
Na ka liang kitei ki ar ngut ki samla rangbah jong ka East Jaiñtia Hills District, ki kyntu jur ïa ka tnat bor ding ba kan peit bniah bha halor kane ka jingeh ba ki paidbah ki iakynduh ha kaba ïadei bad ka jingkiew palat ka bai bor ding, kumjuh ruh ban pynsngew-thuh bad pynshai lem ïa ki paidbah halor kane bad ruh ban pyrkhat lem ïa ki paidbah kiba pyndonkam bor ding ba kan nym long ka jingban khia than ïa ki.
