22 tylli ki College ki bym pat bud ïa ka NEP 2020, dang bteng ka jingïakhih ka MCTA

Shillong, Nailar 30 : Kumba 22 tylli ki College napdeng ki 75 tylli kiba la pynïasoh ïalade bad ka North Eastern Hill University (NEHU), ki dang buhteng ban bud ïa ka 4-year Undergraduate course jong ka National Education Policy-2020 wat hapdeng ka jingbuh por khatduh jong ka University Grant Commission (UGC).
Ka synjuk ki Nonghikai College-Meghalaya College Teachers’ Association (MCTA) ka dang pynbteng ïa ka jingsangeh shim klas (boycott) ïa ki first semester, kum ka jingpyrshah ïa ka jingleh kyrkieh ka NEHU ban pyntreikam ïa ka NEP-2020.
U General Secretary ka MCTA Dr Airpeace W Rani ula pyntip ba 22 tylli ki college ba la ïasoh bad ka NEHU ki la boycott ïa ki klas ka first semester bad kim treh satia ban shim ïa kino kino ki kam (assignment) ba la ai kat kum ka Policy ba thymmai.
Ka Association ka la phah jingthoh sha u Vice Chancellor Prof PS Shukla ban weng noh ïa ka jingpynbna (notification) ba 12 tarik Nailar, kaba buh por ban pyntreikam noh ïa ka NEP 2020 ïa baroh ki college bala pynïasoh bad ka NEHU.
U Dr Rani ula pyntip ba ka MCTA ka la dep phah ïa ka shithi ha ka 21 tarik Naitung hynrei namar ka jingïai sngap mynthi, ka synjuk ka la sdang ïa ka jingïakhih da kaba kyntait ban ïatreilang (non-cooperation movement) naduh ka 1 tarik Nailar.
“Ngi la ïakhih la jan shibnai. Ngi kyrpad ïa u Vice Chancellor ban weng noh ïa ka jingpybna bad pynkut ïa kane ka jingïapyni bor” ong u Dr Rani.
U Dr Rani ula ong ruh ba ki mat ïakren jong ka Academic Council ka NEHU, kim shym la kren eiei ruh em halor ka jingpyn treikam ïa ka NEP-2020.
Ha kajuh ka por, u VC ka NEHU ula ïaroh ïa ka rai jong kiba bun ki College ban pyntreikam noh ïa ka four-year undergraduate programme (FYUP) kumba la pruid dak ha ka National Education Policy 2020 (NEP 2020).
Nalor kane, u VC ula kyntu ruh ïa ki nonghikai college kiba ïakhih ba kin ïakren sani ha ka ban ïapynbeit noh ïa kino kino ki jingeh bad khot ruh ïa ka MCTA ba kan wan ïakren na ka bynta ban lah shim ïa ka rai kaba mynjur lang.