Nongstoiñ, Nailar 8: Ka Ophis jong ka District Medical bad Health Officer West Khasi Hills District, ha ka sngi nyngkong ka la pynlong ïa ka prokram ha Conference Hall ka ophis DMHO na ka bynta ban pyntreikam ïa ka prokram ai tika hapoh jong ka District, kaba la tip kum ka “Intensified Mission Indradhanush 5.0”.
I Kong,S.M Bang, DPO ICDS Nongstoiñ I la long I Kongsan ha kane ka prokram bad la synran lang da u Bah S. Nongsiej, u ba la wan mih khmat na ka ophis jong u BDO Nongstoiñ kum u Symbud Kongsan, ha ka jingdon ryngkat lang jong u Dr. R. Laloo District Medical and Child Health Officer, West Khasi Hills District. Kiwei pat ki Doctor bad ki nongtrei jong ka ophis DMHO, ki nongtrei jong kiwei pat ki tnad Sorkar bad kiwei kiwei.
I Kongsan, Kong S.M Bang DPO ICDS Nongstoiñ, haba ai jingkren ha kane ka sngi, I la ong ba na ka por sha ka por ka tnad Social Welfare ha ryngkat bad ka tnad ka koit ka khiah, bad ka ophis BDO, ki ju ïatreilang ban pyntyllun ïa ki kam kiba la bynshet ha ki, la ka dei na ka Sorkar Pdeng ne Sorkar Jylla.
Ha kane ka kynti ruh, I Kong S.M Bang, I la kular ban ïatreilang met bad mynsiem bad ka tnat ka koit ka khiah lyngba ki nongtrei Anganwadi ki ASHA bad kiwei kiwei, khnang ba kane ka mission ai tika kan long kaba jop bad ban pynïoh tika sha baroh ki bym pat pyndep lut ïa ki dose tika jong ki.
Haba kren halor kane ka ‘Mission Indradhanush 5.0’, u Dr. R. Laloo, u la ong ba ka thong jong kane ka mission ka long ban pynïoh tika bad ka dose kaba pura sha baroh ki khunlung kiba hapdeng 0-23 bnai, kumjuh sha kito ki bym pat pyndep pura ïa ki dose tika.
Kumjuh ruh na ka bynta ki khynnah kiba hapdeng 2-5 haduh san snem ki bym pat pyndep ïa ka dose kaba nyngkong bad kaba ar jong ka jingpang Measles, nangta ka tika na ka bynta ka Pentavalent bad ka jingpyndih dawai Polio, ka tika sha ki longkmie kiba ar met la ka dei ïa kito kiba la ïoh tika hynrei ki bym pyndep pura ïa ka dose.
La phiah ïa kane ka prokram ai tika ha ki lai bynta, ka wat kaba nyngkong kan sdang naduh ka 7-12 tarik u Nailar 2023, ka wat kaba ar kan sdang ha ka 11-16 tarik u Nailar 2023 bad ka wat kaba lai kan sdang naduh ka 9-14 tarik u Risaw 2023.
U Dr. R. Laloo, u la ong ruh ba watla, ki la don ki Block bad ki jaka sumar hapoh West Khasi Hills, District, kiba la kynjoh 95% ka jingai tika, hynrei ki dang don bun kiwei pat ki Block bad ki jaka sumar ki bym pat kynjoh ïa kane ka thong bad ka West Khasi Hills, District, ka dei ka District kaba bun tam napdeng ki nongai tika ki bym pyndep pura ïa ka dose tika jong ka jingpang Measles Rubella.
Haba kheiñ ïa ka percentage jong kiba ai tika na ka bynta kane ka jingpang, ka long 95% ki lah dep ai ïa ka dose kaba nyngkong katba ïa ka dose kaba ar ka long tang 69%, bad ka hiar haduh 26%.
U la ong ba ka ka Sorkar India, ka don ïa ka thong ban rat dyngkhong ïa ka jingpang Measles Rubella napoh Ri India ha u bnai Nohprah 2023 bad ban poi sha kane ka thong ka donkam ïa ka jingïatreilang jong baroh.
U la kyntu jur ïa baroh ki kmie ki kpa ba kin wan sha khmat ban ai tika ïa ki khun jong ki, khnang ban pynlong ïa ka West Khasi Hills District, ka District kaba lait na ka jingpang Measles Rubella.
U Dr. W. Sutnga, Jr. Specialist, O/o DMHO, West Khasi Hills, District u la plie ïa kane ka prokram da ka jingkren pdïang bad u Dr. R. Marweiñ, Jr. Specialist O/o DMHO, West Khasi Hills District, u la ai ïa ka jingkren khublei bad pynkut ïa kane ka prokram.
