Nongpoh, Nailar 08: Ki dkhot nongïalam ka RBYF bad ka FKJGP Umsning Circle ki la ioh ban bat haduh 9 ngut ki bar jylla kiba wan ban rung tuh sha ka jylla na ka bynta ban bsuh khlieh ha ki kam bylla siang rong khlem da biang ki kot ki sla.
Kitei ki 9 ngut ki bar jylla ki dei kiba wan na ka jylla Assam lyngba ka Kali Tata Mobile kaba don ïa u number AS 11 EC 0412 bad kaba la thoh ruh ‘ ON PWD Duty’ bad na ka liang kitei ki dkhot nongïalam ka RBYF bad FKJGP Umsning Circle ki la bat noh ïa kitei ki bar jylla dei namar ba ki la kynnoh ba ki rieh ïa lade hapoh katei ka kali da kaba kah ïa lade da ki kynja kor ba pyndonkam ha kaba siang rong ïa ka surok.
Ïa kitei ki bar jylla la ioh bat da ki dkhot ka RBYF bad FKJGP ha Umsning bad hadien ba la bat ki la leit ban aiti noh sha ki bor pulit ka Umsning Police Outpost ban tohkit ïa kitei ki bar jylla kiba la wan ban rung tuh lyngba katei ka Kali.
Haba kren sha ki lad pathai khubor, u President ka RBYF, u Bah Balakmen Nongbri bad u Secretary ka FKJGP Umsning Circle, u Bah Stieve Wahlang,ki la ong ha ka jingshisha kum ki nongïalam ka seng kim don kata ka jingthmu ban khang ïa kino kino kiba wan bar jylla kiba wan bylla sha kane ka jylla, hynrei ki dei pat ban burom da kaba pynbiang ïa ki kot ki sla ha kaba kumba la lap da ka seng kitei ki bar jylla kim don satia ïa ki kot ki sla bad wat ha Infiltration check gate Byrnihat ruh ki la shu rung tuh da kaba rieh hapho katei ka Kali ban kah da ki kor ki bor ba pyndonkam ha kaba siang rong ïa ka surok.
Na ka liang ka seng, kitei ki nongïalam ki la kyntu jur ïa ki tnad treikam sorkar bapher bapher bad ruh wat ki Contractor ruh ki hap ban pyrkhat lem ïa laka jylla da kaba ki hap ban pynbiang ïa ki kot ki sla haba ki wan rah ïa ki nongtrei bar jylla, namar lada ailad kumne khlem da biang ki kot ki sla lada jia ba mih kino kin ki jingjia ba sngewsih mano ban shim ïa ka jingkitkhlieh, la ong kitei ki nongïalam.
Shuh shuh, ki la bynrap ruh da kaba ong ba ka seng ka maham ruh nangne shakhmat ba kan dang peitngor ïa kino kino kiba wan na shabar ban wan bylla sha kane ka jylla, namar kum ka seng kam kwah ba kane ka jylla kan long kata ka jylla kaba kiwei kiba nabar kin shuh ioh suk ban wan ruh khlem da don kino kino ki kyndon bad ka jingma hi kiba ïa kren ka seng ka sngewkhia halor ka jingma kaba ktah na ka jingwan rung kynthep ki briew kiba na shabar ka jylla, ki la bynrap shuh shuh.
