Jowai, Nailar, 08: Ka All Jaiñtia Muster Roll Workers & Labour Union (AJMRWLU) ryngkat ka All Jaiñtia Mid Day Meal Worker Union Jowai (PM-POSHAN), ha ka sngi siatjaiñ ki la shim ïa rai ban pynkup burom ïa u Myntri Rangbah ka Jylla u Conrad K. Sangma halor ka jingshimkhia jong ka Sorkar ïa ki jingdawa ban kyntiew ïa ka bainong jong ki naduh u snem 2018.
Ïa kane ka jingpynkup burom yn pynlong ha ka 17 tarik, Nailar, 2023 ha madan Ummulong West Jaiñtia Hills District, ha kaba ki dkhot jong kine ki ar Union na kylleng ki District jong ka Jylla kin wan ban sakhi lang, kaba long ruh shi bynta na ka jingïakynduh lang jong ki ha ka ‘General Meeting’ kaba ju long manla ka snem.
U Ma K.L. Pariat kum u nongaibuit ka seng u la pynsngew naduh katei ka snem 2018 ba ka seng Muster Roll ka la dawa ïa ki jingdonkam, na ka liang ka sorkar ruh ka la ïarap ïa ki nongtrei Muster Roll ban kyntiew ïa ka bainong jong ki manla u bnai bad kumjuh ïa ki nongshet ja sngi ha ki skul mynta la kyntiew ïa ka bai nong ai sngewbha kaba long T. 1100 na ka Sorkar Jylla bad T. 900 na ka Sorkar Kmie.
U la pynsngew kum ka akor ka burom kila sngew donkam ban leh ïa kane ka jingpynkup burom ba kyrpang ïa u Myntri Rangbah ha katei ka sngi ha ryngkat ka jingdonlang u Symbud Myntri Rangbah ma Sniawbhalang Dhar, ki MLA napoh ka Ri-Lum Jaiñtia nalor kiwei de.
Ha kajuh ka por ula kyntu ïa ka sorkar na ka bynta ki nongtrei Muster Roll dei ban pynshong thiat ïa ki na ka kam sha ka 62 snem bad la kyntu na u Myntri Rangbah ba un shimkhia ïa kane.
Ka President jong ka seng ka kong Dayoo Ïakai ka kyntu ïa baroh ki dkhot jong ki Union ba kin wan sha kane ka jingïalang, da kaba pyntip ba na ka liang ka Union kala dep ban phah jingthoh ruh sha ki tnad sorkar bad ki skul bapher bapher ba kin pylliat ïa ki nongtrei bylla Muster Roll bad ki nongshet ja sngi ban leit ïashim bynta sha katei ka sngi.
