Jowai, Nailar 08: U ma Comingone Ymbon myntri ba dei peit ïa ka tnad Civil Defence & Home Guards jong ka sorkar jylla mynta ka sngi ula plie ïa u mawnongrim ba la pynkiew kyrdan ïa ka Raliang Police Out Post sha ka Raliang Police Station, haka jingïadon lang jong u Superintendent of Police ka West Jaiñtia Hills u ma C. Syrti, MPS.
Ïa ka jingïalang ha kane ka sngi la wan ban sakhi lang naduh ki nongshong shnong jong katei ka thaiñ kynthup ïa ki longkpa, ki longkmie bad ki khun samla.
U ma Ymbon kum u kongsan haba ai jingkren ula pynsngew halor ka jingpyrshang jong u ban ïakren manla ka por bad ka sorkar naka bynta ban kyntiew kyrdan ïa kane ka Police OP sha ka Police Station, hynrei mynta ka sngi kala urlong noh bad u kyrmen skhem lyngba kane ka PS kan ïarap shibun eh ïa ki paidbah kiba donkam jingïarap na kane ka PS.
Shuh shuh ula ong ka jingdon kane ka PS kan kham pynsuk bad pynïajan ïa ki paidbah halor ka rukom treikam bad ki pulit, ha ka juh ka por yn teh lakam ruh ïa ki kam sniew kiba ha rukom.
Ula pynsngew ba kane ka sngi kan long ka jingsah kymmaw ïa baroh ki nongshong shnong kane ka thaiñ, namar nangne shakhmat ula ong ba ki paidbah kim donkam shuh ban leit donkam shaduh Jowai ne sha kiwei de ki Police Station
Khnang ban pynsuk shuh shuh ïa kane ka ophis treikam PS, u buh ka jingkyntu ïa ka Dorbar Shnong ba ka ïarap ban pynïoh ïa ka jaka kaba biang bad kaba kham heh na ka bynta ka jingdonkam jong kane ka PS ha kine ki sngi ban wan.
