Kyrmen ka HITO ba ka MCH ha Umran Parila kan urlong bad plie noh shen kumba la kular ka Myntri

Nongpoh Nailar 08: Ka seng HITO Ri-Bhoi District kala phah syndon da ka jingthoh sha ka kong Ampareen Lyngdoh Myntri ka tnad ka koit ka khiah ka jylla, ban pynkynmaw halor ki rai jingïakren naka bynta ban pynbit pynbiang ïa baroh ki jingdonkam naka bynta ban ioh ban plie noh ïaka Maternity and Child Hospital kaba don haka shnong Umran Parila kaba dei ka jaka sumar jong ka sorkar naka bynta ki longkmie bad khyllung kumba ka Myntri kala dep ruh ban leit jurip bad ka seng haka 8 tarik Jymmang mynta u snem.
“Ngi pynkynmaw namar ngi kwah ban tip kumba la ïa kren ba hadien shibnai yn ai jingtip bad hadien ar bnai nalor ka shibnai kaba la kot mynta sha ka lai bnai mynta ka sngi ba kiei ki jingpynkhreh kiba la ïaid bad lah dep pynbit pynbiang ïaki jingdonkam naka bynta ban ioh ban plie noh ïa katei ka hospital hadien ka 6 bnai, kaba mut la kumno kumno ha u bnai Nohprah la lah ban plie ïaka” la pynpaw u Bah Ban Kharnaior President ka HITO bad u Kenny Nongrum Secretary haba phah ïaka kyrwoh.
Ki la ong ruh ba katei ka jaka sumar kala dei kawei naki jaka sumar kaba donkam eh ha katei ka thaiñ khamtam ban ai ka jingshakri naka bynta ki longiing ba duk ba rangli ki bym lah lane iohlad ban leit sha ki jaka sumar ba kham jngai bad kham bha.
Naka liang ka seng kala pynpaw ruh ba nalor katei ka Hospital, ki don ruh shibun kiwei pat ki jingtei naduh ka Ayush Hospital haka shnong Umtrew, ki jingtei ha Lum Sohpetbneng naka tnad jngohkai pyrthei, ka DMHO Building, ka Model Degree College ha Jirang, ka Residential School ha Mawtari Myrdon, ka Polytechnic ha Nongkhrah bad kiwei kiwei ki jingtei bad kyrmen ba kitei ki jingtei kin long ki jingmyntoi naka bynta ki paidbah ka dong ka thaiñ ym ba kin long tang ki jingai kam kontrak ne pynriew spah ïano ïano.
Namarkata naka liang ka seng ka kala pynkynmaw ba kane ka jingbudien jong ka seng kan tied jingkhang ïaki skhor ka sorkar ba ka ktien kan ïadei bad ka kam.