Nongstoiñ, Nailar 8: Ha ka sngi saitjaiñ jong kane ka taïew, ki pulit ka Nongstoiñ ki la ïoh ban sei noh ïa ka met jong u (L) Elius Thabah 38 u ba na ka shnong Laitkor, hadien ba u la ngam jyllop ha wah Rwiang ha ka por ba u leit khwai ryngkat bad u para lem bad uwei pat u paralok.
Katkum ka khubor ba la ïoh lum na ki pulit la ong ba ha ka sngi thohdieng, kitei ki lai ngut ki la leit khwai na katei ka wah hynrei ha ka por janmiet haba ki la wan phai, ki ar ngut ki la ap ïa u kham shaneng ha ka lynti ban wan phai.
Hynrei haduh ban da sdang kem dum um shym la wan phai, kumta ki la leit pyrta hynrei ym shym la ïoh sngew ban ai dak ei ei. Kumta ki la leit wad sharud wah hynrei kim lap satia.
Hadien kata ki la wan phai noh bad ki la pyntip sha ki pulit ha kaba ki pulit ruh ki la hiar wut wut sha katei ka jaka, ha ryngkat ka jingïatreilang jong ki nongshong shnong Umjaru, Mawthangblang bad Rwiang ki pulit Special Rescue Team jong ka tnad Fire Service ki la ïoh ban sei noh ïa ka met jong utei u rangbah.
