Pawnam u Sohtrun na Ri-Bhoi, yn sa nang pynkhlaiñ shuh shuh ïa ki Processing Unit bad Cold Storage : Ampareen Lyngdoh

Nongpoh, Nailar 05: Ka Ri-Bhoi Tourism & Environmental Forum (RBTEDF) ha sien kaba ba 3 kala lah biang ban pynlong biang ïaka tamasa Sohtrun ha Ri-Bhoi District, hadien katto katne snem bala pynsangeh ïaka naka daw ka khlam Covid-19 kaba dei ruh kawei naki jingangnud ka seng ban kyntiew ïaka kam rep sohtrun bad kumjuh ruh ban kyntiew ïaka ioh ka kot ki nongrep lyngba ka kam rep sohtrun ha Ri-Bhoi.
Ïa katei ka tamasa 3rd Pineapple Festival la pynlong ha phyllaw jong ka ophis u District Transport Officer ha kaba u ka Kong Ampareen Lyngdoh Myntri ka tnad ka rep ka riang ka jylla ka la wan ban shim bynta kum u kongsan haka jingdon lang u Bah Mayralborn Syiem MLA ka Nongpoh, Bah Balajied Ranee MDC, ki ophisar naki tnad sorkar bapher bapher ryngkat ki nongïalam ka RBTEDF ba kynthup ïa u Bah plielad Tiewsoh kum u Chairman bad ki dkhot.
Ki paidbah na kylleng ki dong bad ki thaiñ kila wan ruh ban sakhi ha katei ka sngi ïa katei ka Iew pyn-i-nam ïaki sohtrun naka bynta ban iohi bad mad ïaki sohtrun bala pynmih da ki nongrep na Ri-Bhoi ha kaba la don ruh palat phew tylli ki dukan bala pynbeit bad pynitynnad da ki sohtrun.
Kum ban shu pynpaw ba u Sohtrun ba la pynmih na Ri-Bhoi u dei u soh u ba la pawnam nalor ka jingbha bad ka jingthiang, ha kaba ka Ri-Bhoi kala iohnam ruh kum ka jaka pynmih Sohtrun ba bun tam haka jylla kiba la lah ruh ban shalan kylleng sawdong ki jaka bad wat shabar ka jylla.
Nalor katei ka tamasa ban pyninam ïaki Sohtrun la don ruh shibun ki prokram pynbyrngia naduh ka shad ka tem, ka rwai ka siaw ryngkat ki jingrwai bad jingshad tynrai kiba la pynphuh pynphieng bad ishong kun ha katei ka sngi.
Haba kren ha kane ka sngi kum ka kongsan ka kong Ampareen Lyngdoh Myntri ka tnad ka rep ka riang ka jylla ka la ai ka jingïaroh ïaki nongïalam ka RBTEDF kiba la shimkhia ban pynlong biang ïa katei ka tamasa Sohtrun naka bynta ban ïarap ïaki nongrep ban kyntiew bad pynshlur ïaka kam rep sohtrun.
Ka la ong ruh ba ka Ri-Bhoi ka dei kawei naki jaka ba pawnam balah ruh ban pynmih shibun ki mar rep nalor u Sohtrun bad kiwei kiwei ki jait soh, bad kumba long mynta ka Ri-Bhoi kala don ruh 4 tylli ki Cold Storage ha kaba la nang donkam shuh shuh kum ka jingïarap ïaki nongrep khang ba ki soh bad ki jait jingpynmih jong ki naki kper kin nym pyut.
Kala ong ruh ba u ka sorkar mynta ka pynleit jingmut ban ïarap ïaki nongrep sha ki thaiñ nongkyndong kumba u Sohtrun u la dei uwei naki jait soh na Ri-Bhoi ba ka pyrthei baroh kawei kala sdang ban tip kumba kila don ruh ka jingshalan shabar jylla bad wat shabar ri, bad lyngba ka jingtrei shitom ki nongrep bad ka jingïarap jong ka sorkar yn sa nang pynkhraw shuh shuh ïaka kam rep sohtrun ha Ri-Bhoi, khamtam ban pynkhlaiñ shuh shuh ïaki Processing Unit ban pynmih shibun ki jait umsoh bad ki jait jingbam bala ban pynmih na u Sohtrun.
Ha katei ka sngi kumba 23 tylli ki dukan kila wan ban pyninam ïaki jait sohtrun, ki umsoh bad ki wine bala pynmih na u Sohtrun ha kaba la sakhi ruh ba ki paidbah kila tuid ban leit mad ïa u Sohtrun ba thiang bala pynmih da ki nongrep na Ri-Bhoi.